اور تم (اب) کیونکر کفر کرو گے حالانکہ تم پر خدا کی آیتیں پڑھی جاتی ہیں اور تم میں اس کے پیغمبر موجود ہیں اور جس نے خدا (کی ہدایت کی رسی) کو مضبوط پکڑا وہ سیدھے راستے لگ گیا

مومنو! خدا سے ڈرو جیسا کہ اس سے ڈرنے کا حق ہے اور مرنا تو مسلمان ہی مرنا۔

اور سب مل کر خدا کی (ہدایت کی) رسی کو مضبوط پکڑے رہنا اور تفرقہ نہ ڈالنا اور اپنے اوپر خدا کی نعمت کو یاد کرو جب تم ایک دوسرے کے دشمن تھے تو اس نے تمہارے دلوں میں الفت ڈال دی اور تم اس کی مہربانی سے بھائی بھائی ہوگئے اور تم آگ کے گڑھے کے کنارے تک پہنچ چکے تھے تو خدا نے تم کو اس سے بچا لیا اس طرح خدا تم کو اپنی آیتیں کھول کھول کر سناتا ہے تاکہ تم ہدایت پاؤ۔

اور تم میں ایک جماعت ایسی ہونی چاہیئے جو لوگوں کو نیکی کی طرف بلائے اور اچھے کام کرنے کا حکم دے اور برے کاموں سے منع کرے یہی لوگ ہیں جو نجات پانے والے ہیں۔

اور ان لوگوں کی طرح نہ ہونا جو متفرق ہوگئے اور احکام بین آنے کے بعد ایک دوسرے سے خلاف کرنے لگے یہ وہ لوگ ہیں جن کو بڑا عذاب ہوگا۔

جس دن بہت سے منہ سفید ہوں گے اور بہت سے منہ کالے تو جن لوگوں کے منہ کالے ہوں گے (ان سے خدا فرمائے گا) کیا تم ایمان لا کر کافر ہوگئے تھے؟ سو اب کفر کے بدلے عذاب (کے مزے) چکھو۔

اور جن لوگوں کے منہ سفید ہوں گے وہ خدا کی رحمت (کے باغوں) میں ہوں گے اور اس میں ہمیشہ رہیں گے۔

یہ خدا کی آیتیں ہیں جو ہم تم کو سچائی کے ساتھ پڑھ کر سناتے ہیں اور خدا اہل عالم پر ظلم نہیں کرنا چاہتا۔

اور جو کچھ آسمانوں میں ہے اور جو کچھ زمین میں ہے سب خدا ہی کا ہے اور سب کاموں کا رجوع خدا ہی کی طرف ہے۔

مومنو) تم بہترین امت ہو جو لوگوں کے لئے پیدا کی گئی ہے کہ تم نیک کاموں کا حکم کرتے ہو اور برے کاموں سے روکتے ہو اور خدا پر ایمان رکھتے ہو اور اگر اہل کتاب بھی ایمان لے آتے تو ان کے لئے بہت اچھا ہوتا ان میں سے کچھ تو مومن ہیں اور اکثر نافرمان ہیں۔

یہ تمہیں ستانے کے سوا کچھ نقصان نہیں پہنچا سکیں گے اور اگر تم سے لڑیں گے تو پیٹھ پھیر کر بھاگ جائیں گے پھر ان کو (خدا کی طرف سے) مدد بھی نہیں ملے گی۔

یہ جہاں دیکھے گئے ذلت (کی مار) ان پر پڑی۔ مگر خدا کے عہد یا لوگوں کے عہد کے سہارے (پناہ مل جائے تو بچ جاتے ہیں) اور یہ خدا کے غضب میں گرفتار ہیں اور ان پر محتاجی مسلط کردی گئی ہے۔ یہ اس لئے کہ خدا کی آیتوں کا انکار کرتے تھے اور انبیاء کو ناحق قتل کر ڈالتے تھے۔ (اور) یہ اس لئے کہ نافرمانی کرتے اور حد سے بڑھ جاتے تھے۔

یہ سب برابر نہیں ہیں۔ اہل کتاب میں سے کچھ لوگ (حق پر) قائم بھی ہیں جو رات کے وقت خدا کی آیتیں پڑھتے اور سجدے کرتے ہیں۔

یہ خدا اور روز آخرت پر ایمان رکھتے اور نیک کاموں کا حکم دیتے اور برے کاموں سے منع کرتے اور نیکیوں میں جلدی کرتے ہیں۔ اور یہ نیکوکار لوگ ہیں۔

اور وہ جو نیک کام کریں گے ان کی ناقدری نہیں کی جائے گی اور خدا پرہیزگاروں کو خوب جانتا ہے۔

جو لوگ کافر ہوئے ان کے مال اور ان کی اولاد خدا کے غضب کو ہرگز نہیں ٹال سکیں گے اور وہ دوزخی ہیں اور ہمیشہ دوزخ میں رہیں گے۔

یہ لوگ جو مال دنیا کی زندگی میں خرچ کرتے ہیں اس کی مثال ہوا کی سی ہے جس میں جاڑا ہو اور وہ ان لوگوں کی کھیتی پر چلے جنہوں نے اپنے آپ پر ظلم کیا ہو اور اسے برباد کر دے۔ اور خدا نے ان پر ظلم نہیں کیا بلکہ یہ خود اپنے اوپر ظلم کرتے ہیں۔

مومنو! کسی غیر (مذہب کے آدمی) کو اپنا رازداں نہ بنانا یہ لوگ تمہاری خرابی اور فتنہ انگیزی میں کسی طرح کی کوتاہی نہیں کرتے اور چاہتے ہیں کہ جس طرح ہو تم تکلیف میں پڑ جاؤ۔ ان کے مونہوں سے تو دشمنی ظاہر ہوچکی ہے اور جو کینہ ان کے سینوں میں مخفی ہے وہ کہیں زیادہ ہے۔ اگر تم عقل رکھتے ہو تو ہم نے تم کو اپنی آیتیں کھول کھول کر سنا دی ہیں۔

دیکھو تم ایسے (صاف دل) لوگ ہو کہ ان سے دوستی رکھتے ہو حالانکہ وہ تم سے دوستی نہیں رکھتے اور تم سب کتابوں پر ایمان رکھتے ہو (اور وہ تمہاری کتاب کو نہیں مانتے) اور جب تم سے ملتے ہیں تو کہتے ہیں کہ ہم ایمان لے آئے ہیں اور جب اکیلے ہوتے ہیں تو تم پر غصے کے مارے انگلیاں کاٹتے ہیں۔ (ان سے) کہہ دو کہ اپنے غصے میں آپ مر جاؤ۔ خدا دلوں کے بھیدوں سے خوب واقف ہے۔

اگر تمہیں کوئی آسائش حاصل ہو تو ان کو بری لگتی ہے اور اگر کوئی رنج پہنچے تو خوش ہوتے ہیں اور اگر تم (تکلیفوں پر) صبر کرو اور (خدا سے) ڈرتے رہو تو ان کا مکر تمہیں کچھ نقصان نہ پہنچا سکے گا۔ یہ جو کچھ کرتے ہیں خدا اس کا احاطہ کئے ہوئے ہے۔

اور (اس وقت کو یاد کرو) جب تم صبح کے وقت اپنے گھر سے نکلے اور مسلمانوں کو لڑائی کے لئے مورچوں پر متعین کرنے لگے۔ اور خدا (سب کچھ) سنتا جانتا ہے۔

جب تم میں سے دو جماعتوں نے چاہا کہ ہمت ہار بیٹھیں حالانکہ خدا ان کا مددگار تھا اور مومنوں کو خدا ہی پر بھروسہ رکھنا چاہیئے۔

اور خدا نے جنگ بدر میں بھی تمہاری مدد کی تھی حالانکہ تم (مقدار اور سامان میں) حقیر (یعنی کم) تھے۔ پس خدا سے ڈرو تاکہ شکر کرو۔

جب تم مومنوں سے کہہ رہے تھے کیا تمہیں یہ کافی نہیں کہ پروردگار تین ہزار فرشتے نازل کر کے تمہاری مدد کرے۔

ہاں اگر تم صبر کرو اور (خدا سے) ڈرتے رہو اور کفار تم پر جوش کے ساتھ دفعتہً حملہ کر دیں تو پروردگار پانچ ہزار فرشتے جن پر نشان ہوں گے تمہاری مدد کو بھیجے گا۔

اور اس مدد کو خدا نے تمہارے لئے محض خوشخبری بنایا اور اس لئے کہ اس سے تمہارے دلوں کو اطمینان حاصل ہو اور مدد تو (ہر صورت میں) خدائے غالب و دانا ہی کی طرف سے ہے۔

تاکہ کافروں کی ایک جماعت کو کاٹ دے یا انہیں رسوا کر دے کہ (وہ) نامراد ہو کر لوٹ جائیں۔

(اے پیغمبر) اس کام میں تمہارا کچھ اختیار نہیں (خدا کو اختیار ہے) چاہے ان پر مہربانی کرے چاہے ان کو عذاب دے کہ وہ ظالم ہیں۔

اور جو کچھ آسمانوں میں ہے اور جو کچھ زمین میں ہے سب خدا ہی کا ہے۔ وہ جسے چاہے بخش دے اور جسے چاہے عذاب کرے۔ اور خدا بخشنے والا مہربان ہے۔

مومنو! دوگنا اور چوگنا کر کے سود مت کھاؤ اور خدا سے ڈرو تاکہ نجات پاؤ۔

اور دوزخ (کی آگ) سے بچو جو کافروں کے لئے تیار کی گئی ہے۔

اور خدا اور اس کے رسول کی اطاعت کرو تاکہ تم پر رحمت کی جائے۔

اور اپنے پروردگار کی بخشش اور بہشت کی طرف لپکو جس کا عرض آسمان اور زمین کے برابر ہے اور جو (خدا سے) ڈرنے والوں کے لئے تیار کی گئی ہے۔

جو آسودگی اور تنگی میں (اپنا مال خدا کی راہ میں) خرچ کرتے ہیں اور غصے کو روکتے اور لوگوں کے قصور معاف کرتے ہیں اور خدا نیکوکاروں کو دوست رکھتا ہے۔

اور وہ کہ جب کوئی کھلا گناہ یا اپنے حق میں کوئی اور برائی کر بیٹھتے ہیں تو خدا کو یاد کرتے اور اپنے گناہوں کی بخشش مانگتے ہیں۔ اور خدا کے سوا گناہ بخش بھی کون سکتا ہے؟ اور جان بوجھ کر اپنے کیے پر اصرار نہیں کرتے۔

یہی لوگ ہیں جن کا بدلہ ان کے پروردگار کی طرف سے بخشش اور باغ ہیں جن کے نیچے نہریں بہہ رہی ہیں (اور) ان میں ہمیشہ رہیں گے اور (نیک) کام کرنے والوں کا بدلہ بہت اچھا ہے۔

تم سے پہلے بھی (بہت سے) واقعات گزر چکے ہیں سو زمین میں سیر کرو اور دیکھو کہ جھٹلانے والوں کا انجام کیسا ہوا۔

یہ لوگوں کے لیے (صاف) بیان ہے اور پرہیزگاروں کے لیے ہدایت اور نصیحت ہے۔

اور (دیکھو) بے دل نہ ہونا اور نہ کسی طرح کا غم کرنا اگر تم مومن (صادق) ہو تو تم ہی غالب رہو گے۔

اگر تمہیں زخم (شکست) لگا ہے تو ان لوگوں کو بھی ایسا ہی زخم لگ چکا ہے اور یہ دن ہیں کہ ہم ان کو لوگوں میں بدلتے رہتے ہیں اور اس سے یہ بھی مقصود تھا کہ خدا ایمان والوں کو متمیز کر دے اور تم میں سے گواہ بنائے اور خدا ظالموں کو پسند نہیں کرتا۔

اور یہ بھی مقصود تھا کہ خدا ایمان والوں کو خالص (مومن) بنا دے اور کافروں کو نابود کر دے۔

کیا تم یہ سمجھتے ہو کہ (بے آزمائش) بہشت میں جا داخل ہوگے حالانکہ ابھی خدا نے تم میں سے جہاد کرنے والوں کو تو معلوم کیا ہی نہیں اور (یہ بھی) معلوم نہیں کیا کہ (مصبت میں) صبر کرنے والے کون ہیں۔

اور تم موت (شہادت) کے آنے سے پہلے اس کی تمنا کیا کرتے تھے سو تم نے اس کو آنکھوں سے دیکھ لیا۔

اور محمد تو صرف (خدا کے) پیغمبر ہیں۔ ان سے پہلے بھی بہت سے پیغمبر ہو گزرے ہیں۔ بھلا اگر یہ فوت ہو جائیں یا مارے جائیں تو تم الٹے پاؤں پھر جاؤ گے؟ اور جو الٹے پاؤں پھر جائے گا تو خدا کا کچھ نہیں بگاڑے گا اور خدا شکر گزاروں کو (بڑا) ثواب دے گا۔

اور کسی ذی روح میں طاقت نہیں کہ خدا کے حکم کے بغیر مر جائے (اس نے موت کا) وقت لکھ رکھا ہے اور جو شخص دنیا میں (اپنے اعمال کا) بدلہ طلب کرے اس کو ہم یہیں دے دیں گے اور جو آخرت میں طلب کرے گا اسے وہاں دیں گے اور ہم شکر گزاروں کو عنقریب (اچھا) بدلہ دیں گے۔

اور کتنے ہی پیغمبر ہوئے ہیں جن کے ساتھ ہو کر بہت سے اللہ والوں نے جہاد کیا تو جو مصبتیں ان پر راہ خدا میں پڑیں ان سے نہ تو انہوں نے ہمت ہاری اور نہ بزدلی کی اور نہ (کافروں سے) دبے اور خدا استقلال رکھنے والوں کو دوست رکھتا ہے۔

اور وہ (اس حالت میں) یہی کہتے تھے کہ اے ہمارے پروردگار ہمارے گناہ اور زیادتیاں جو ہمارے کاموں میں ہوئیں معاف فرما اور ہم کو ثابت قدم رکھ اور کافروں پر فتح عنایت کر۔

تو خدا نے ان کو دنیا میں بھی بدلہ دیا اور آخرت کا بہت اچھا بدلہ (بھی دے گا) اور خدا نیکوکاروں کو دوست رکھتا ہے۔

مومنو! اگر تم کافروں کا کہا مانو گے تو وہ تم کو الٹے پاؤں پھیر دیں گے پھر تم خسارے میں پڑ جاؤ گے۔

(یہ تمہارے مددگار نہیں) بلکہ خدا تمہارا مددگار ہے اور وہ سب سے بہتر مددگار ہے۔