اے ایمان والو! اپنے اقراروں کو پورا کرو۔ تمہارے لئے چارپائے مویشی حلال کر دیئے گئے ہیں بجز ان کے جو تمہیں پڑھ کر سنائے جاتے ہیں مگر حالت احرام میں شکار کو حلال نہ جاننا، بیشک اللہ جو چاہتا ہے حکم دیتا ہے۔

اے ایمان والو! خدا کے شعائر کی بے حرمتی نہ کرو اور نہ ادب والے مہینوں کی اور نہ حرم میں قربانی ہونے والے جانوروں کی اور نہ ان جانوروں کی جن کے گلے میں پٹے بندھے ہوں اور نہ ان لوگوں کی جو عزت والے گھر (بیت اللہ) کا قصد کرکے اپنے پروردگار کا فضل اور اس کی خوشنودی تلاش کرنے آتے ہیں۔ اور جب تم احرام کھول دو تو شکار کر سکتے ہو۔ اور کسی قوم کی دشمنی اس وجہ سے کہ انہوں نے تمہیں مسجد حرام سے روکا تھا تمہیں اس بات پر آمادہ نہ کرے کہ تم زیادتی کرنے لگو۔ اور نیکی اور پرہیزگاری کے کاموں میں ایک دوسرے کی مدد کیا کرو اور گناہ اور ظلم کے کاموں میں مدد نہ کیا کرو اور اللہ سے ڈرتے رہو۔ بیشک اللہ سخت عذاب دینے والا ہے۔

تم پر حرام کیا گیا مردار اور خون اور سور کا گوشت اور وہ جانور جس پر خدا کے سوا کسی اور کا نام پکارا گیا ہو اور وہ جو گلا گھٹ کر مر جائے اور جو چوٹ لگ کر مر جائے اور جو گر کر مر جائے اور جو سینگ لگ کر مر جائے اور جسے درندے پھاڑ کھائیں مگر جسے تم (مرنے سے پہلے) ذبح کر لو اور وہ جانور جو تھانوں پر ذبح کیا جائے اور یہ بھی حرام ہے کہ پانسوں کے ذریعے قسمت معلوم کرو۔ یہ سب گناہ کے کام ہیں۔ آج کافر تمہارے دین سے مایوس ہوگئے ہیں تو ان سے مت ڈرو اور مجھی سے ڈرو۔ آج میں نے تمہارے لئے تمہارا دین مکمل کر دیا اور تم پر اپنی نعمت پوری کر دی اور تمہارے لئے اسلام کو بحیثیت دین پسند کر لیا۔ پھر جو شخص بھوک میں ناچار ہو جائے بشرطیکہ گناہ کی طرف مائل نہ ہو تو بیشک اللہ بخشنے والا مہربان ہے۔

تم سے پوچھتے ہیں کہ ان کے لئے کیا کچھ حلال ہے؟ کہہ دو کہ تمہارے لئے پاکیزہ چیزیں حلال کر دی گئی ہیں اور جن شکاری جانوروں کو تم نے سدھا رکھا ہو کہ جس طرح خدا نے تمہیں سکھایا ہے تم ان کو سکھاتے ہو تو وہ جس شکار کو تمہارے لئے پکڑ رکھیں اس کو کھا لیا کرو اور اس پر خدا کا نام لے لیا کرو۔ اور خدا سے ڈرتے رہو۔ بیشک خدا جلد حساب لینے والا ہے۔

آج تمہارے لئے سب پاکیزہ چیزیں حلال کر دی گئی ہیں اور اہل کتاب کا کھانا بھی تمہارے لئے حلال ہے اور تمہارا کھانا ان کے لئے حلال ہے۔ اور پاک دامن مومن عورتیں اور پاک دامن عورتیں ان لوگوں میں سے جنہیں تم سے پہلے کتاب دی گئی (تمہارے لئے حلال ہیں) جب تم ان کا مہر ادا کر دو، اس شرط کے ساتھ کہ نکاح میں لانا مقصود ہو، نہ کہ کھلی بدکاری کرنا اور نہ چھپی آشنائی (دوستی) کرنا۔ اور جو شخص ایمان کا انکار کرے گا تو اس کا عمل ضائع ہو گیا اور وہ آخرت میں نقصان اٹھانے والوں میں سے ہوگا۔

اے ایمان والو! جب تم نماز کے لئے اٹھو تو اپنے منہ اور کہنیوں تک ہاتھ دھو لو اور سروں کا مسح کرو اور ٹخنوں تک پاؤں (دھو لو) اور اگر تم جنابت کی حالت میں ہو تو غسل کر کے پاک ہو جاؤ اور اگر بیمار ہو یا سفر میں ہو یا تم میں سے کوئی بیت الخلا سے ہو کر آیا ہو یا تم نے عورتوں سے قربت کی ہو اور تمہیں پانی نہ ملے تو پاک مٹی سے تیمم کر لو (اس طرح کہ) اس سے اپنے منہ اور ہاتھوں کا مسح کر لو۔ خدا تم پر کسی طرح کی تنگی نہیں کرنا چاہتا بلکہ یہ چاہتا ہے کہ تمہیں پاک کرے اور اپنی نعمت تم پر پوری کرے تاکہ تم شکر کرو۔

اور اللہ کے اس احسان کو یاد کرو جو اس نے تم پر کیا ہے اور اس عہد کو (یاد کرو) جو اس نے تم سے لیا تھا جبکہ تم نے کہا تھا کہ ہم نے سنا اور مانا۔ اور اللہ سے ڈرو۔ بیشک اللہ دلوں کی باتوں کو خوب جانتا ہے۔

اے ایمان والو! اللہ کے لئے انصاف کی گواہی دینے کے لئے کھڑے ہو جایا کرو اور کسی قوم کی دشمنی تمہیں اس بات پر آمادہ نہ کرے کہ تم عدل نہ کرو۔ عدل کیا کرو کہ یہ پرہیزگاری سے زیادہ قریب ہے اور اللہ سے ڈرتے رہو۔ بیشک اللہ تمہارے کاموں سے باخبر ہے۔

اللہ نے مومنوں اور نیک عمل کرنے والوں سے وعدہ فرمایا ہے کہ ان کے لئے بخشش اور اجر عظیم ہے۔

اور جنہوں نے کفر کیا اور ہماری آیتوں کو جھٹلایا وہ جہنمی ہیں۔

اے ایمان والو! خدا کے اس احسان کو یاد کرو جو اس نے تم پر کیا جب ایک جماعت نے ارادہ کیا کہ تم پر دست درازی کریں تو اس نے ان کے ہاتھ تم سے روک دیئے اور خدا سے ڈرتے رہو اور مومنوں کو خدا ہی پر بھروسہ رکھنا چاہئے۔

اور اللہ نے بنی اسرائیل سے عہد لیا تھا اور ہم نے ان میں بارہ سردار مقرر کئے تھے۔ اور اللہ نے فرمایا تھا کہ میں تمہارے ساتھ ہوں۔ اگر تم نماز پڑھتے اور زکوٰۃ دیتے رہو گے اور میرے پیغمبروں پر ایمان لاؤ گے اور ان کی مدد کرو گے اور اللہ کو قرض حسنہ دو گے تو میں تم سے تمہارے گناہ دور کر دوں گا اور تم کو بہشتوں میں داخل کروں گا جن کے نیچے نہریں بہہ رہی ہیں۔ پھر جس نے اس کے بعد تم میں سے کفر کیا وہ سیدھے راستے سے بھٹک گیا۔

پھر ان کی عہد شکنی کی وجہ سے ہم نے ان پر لعنت کی اور ان کے دل سخت کر دیئے کہ وہ کلام کو اس کی جگہوں سے بدل دیتے ہیں اور جو نصیحت انہیں کی گئی تھی اس کا ایک بڑا حصہ فراموش کر بیٹھے ہیں اور تم ہمیشہ ان کی کسی نہ کسی خیانت پر مطلع ہوتے رہتے ہو سوائے ان میں سے چند کے۔ سو تم انہیں معاف کر دو اور درگزر کرو۔ بیشک اللہ احسان کرنے والوں کو پسند کرتا ہے۔

اور جو لوگ کہتے ہیں کہ ہم نصاریٰ ہیں ہم نے ان سے بھی عہد لیا تھا مگر انہوں نے بھی اس نصیحت کا جو ان کو کی گئی تھی ایک حصہ فراموش کر دیا۔ تو ہم نے ان کے درمیان قیامت تک کے لئے دشمنی اور کینہ ڈال دیا اور عنقریب اللہ ان کو بتا دے گا کہ وہ کیا کرتے رہے ہیں۔

اے اہل کتاب! تمہارے پاس ہمارے پیغمبر (آخرالزماں) آ گئے ہیں کہ جو کچھ تم کتاب (الٰہی) میں سے چھپاتے تھے وہ اس میں سے بہت کچھ تمہیں کھول کر بتا دیتے ہیں اور بہت سی باتوں سے درگزر کرتے ہیں۔ تمہارے پاس خدا کی طرف سے نور اور روشن کتاب آ چکی ہے۔

جس سے اللہ ان لوگوں کو جو اس کی خوشنودی کے طالب ہیں سلامتی کے راستے دکھاتا ہے اور اپنے حکم سے اندھیروں سے نکال کر روشنی کی طرف لاتا ہے اور ان کو سیدھے راستے پر چلاتا ہے۔

جو لوگ اس بات کے قائل ہیں کہ عیسیٰ بن مریم خدا ہیں وہ بیشک کافر ہیں۔ (ان سے) کہہ دو کہ اگر خدا عیسیٰ بن مریم کو اور ان کی والدہ کو اور جتنے لوگ زمین میں ہیں سب کو ہلاک کرنا چاہے تو اس کے آگے کس کی پیش چل سکتی ہے؟ اور آسمان اور زمین اور جو کچھ ان دونوں میں ہے سب پر خدا ہی کی بادشاہی ہے۔ وہ جو چاہتا ہے پیدا کرتا ہے۔ اور خدا ہر چیز پر قادر ہے۔

اور یہود اور نصاریٰ کہتے ہیں کہ ہم خدا کے بیٹے اور اس کے پیارے ہیں۔ کہو کہ پھر وہ تمہیں تمہارے گناہوں کے سبب عذاب کیوں دیتا ہے؟ (نہیں) بلکہ تم اس کی مخلوقات میں سے ایک آدمی ہو۔ وہ جسے چاہے بخش دے اور جسے چاہے عذاب دے۔ اور آسمانوں اور زمین اور جو کچھ ان دونوں میں ہے سب پر خدا ہی کی حکومت ہے اور اسی کی طرف لوٹ کر جانا ہے۔

اے اہل کتاب! تمہارے پاس ہمارے پیغمبر آ گئے ہیں جو تمہیں (دین کے احکام) کھول کھول کر بیان کرتے ہیں (ایسے وقت میں کہ) پیغمبروں (کے آنے) کا سلسلہ موقوف تھا تاکہ تم یہ نہ کہو کہ ہمارے پاس کوئی خوشخبری سنانے والا یا ڈرانے والا نہیں آیا۔ سو (اب) تمہارے پاس خوشخبری سنانے والا اور ڈرانے والا آ گیا ہے۔ اور اللہ ہر چیز پر قادر ہے۔

اور (یاد کرو) جب موسیٰ نے اپنی قوم سے کہا کہ اے میری قوم! اللہ کے اس احسان کو یاد کرو جو اس نے تم پر کیا ہے کہ تم میں سے پیغمبر پیدا کئے اور تمہیں بادشاہ بنایا اور تمہیں وہ کچھ دیا جو اہل عالم میں سے کسی کو نہیں دیا۔

اے میری قوم! اس مقدس زمین میں داخل ہو جاؤ جو اللہ نے تمہارے نام لکھ دی ہے اور اپنی پیٹھ نہ پھیرنا ورنہ نقصان اٹھانے والے ہو کر پلٹو گے۔

انہوں نے کہا کہ اے موسیٰ! وہاں تو زبردست لوگ رہتے ہیں۔ اور جب تک وہ وہاں سے نکل نہ جائیں ہم ہرگز وہاں داخل نہیں ہوں گے۔ ہاں اگر وہ وہاں سے نکل جائیں تو ہم داخل ہو جائیں گے۔

ان ڈرنے والوں میں سے دو شخص جن پر اللہ نے احسان کیا تھا کہنے لگے کہ ان لوگوں پر (حملہ کر کے) دروازے میں داخل ہو جاؤ۔ جب تم اس میں داخل ہوگئے تو فتح تمہاری ہے اور اگر تم مومن ہو تو اللہ ہی پر بھروسہ رکھو۔

وہ بولے کہ اے موسیٰ! جب تک وہ وہاں موجود ہیں ہم کبھی وہاں نہیں جائیں گے۔ تو، تو اور تیرا رب جا کر لڑو ہم تو یہیں بیٹھے ہیں۔

موسیٰ نے کہا کہ اے میرے رب! میں اپنی جان اور اپنے بھائی کے سوا کسی پر اختیار نہیں رکھتا سو تو ہم میں اور اس نافرمان قوم میں جدائی کر دے۔

خدا نے فرمایا کہ وہ ملک ان پر چالیس برس تک حرام کر دیا گیا ہے کہ وہاں نہ جانے پائیں گے۔ یہ (اسی صحرا میں) سرگرداں پھریں گے تو تم ان نافرمان لوگوں پر افسوس نہ کرنا۔

اور (اے پیغمبر!) انہیں آدم کے دو بیٹوں (ہابیل اور قابیل) کی خبر سنا دیجئے جو بالکل سچی ہے۔ جب دونوں نے (اللہ کے حضور) نیازیں پیش کیں تو ایک کی نیاز قبول ہو گئی اور دوسرے کی قبول نہ ہوئی۔ (قابیل نے) کہا: میں تجھے ضرور قتل کر دوں گا۔ (ہابیل نے) کہا: اللہ تو پرہیزگاروں ہی سے (نیاز) قبول فرماتا ہے۔

اگر تو میرے قتل کے لئے ہاتھ بڑھائے گا تو میں تجھے قتل کرنے کے لئے ہاتھ نہیں بڑھاؤں گا۔ مجھے تو خدائے رب العالمین سے ڈر لگتا ہے۔

میں چاہتا ہوں کہ تو میرا گناہ بھی سمیٹ لے اور اپنا گناہ بھی۔ پھر تو دوزخیوں میں ہو جائے۔ اور ظالموں کی یہی سزا ہے۔

آخر اس کے نفس نے اس کو بھائی کے قتل ہی پر آمادہ کر دیا تو اس نے اسے قتل کر ڈالا اور خسارہ اٹھانے والوں میں ہو گیا۔

پھر اللہ نے ایک کوا بھیجا جو زمین کریدنے لگا تاکہ اسے دکھائے کہ اپنے بھائی کی لاش کیسے چھپائے۔ کہنے لگا ہائے شامت! مجھ سے اتنا بھی نہ ہو سکا کہ اس کوے جیسا ہی ہو جاتا کہ اپنے بھائی کی لاش چھپا دیتا۔ پھر وہ پشیمان ہوا۔

اسی سبب سے ہم نے بنی اسرائیل کے لئے حکم لکھ دیا کہ جس نے کسی انسان کو خون کے بدلے یا زمین میں فساد پھیلانے کے سوا کسی اور وجہ سے قتل کیا تو گویا اس نے تمام انسانوں کو قتل کر دیا اور جس نے کسی کی جان بچا لی تو گویا اس نے تمام انسانوں کو زندہ کر لیا۔ اور ان لوگوں کے پاس ہمارے پیغمبر روشن دلیلیں لا چکے ہیں پھر بھی ان میں سے بہت سے لوگ زمین میں زیادتی کرنے والے ہیں۔

جو لوگ خدا اور اس کے رسول سے لڑائی کریں اور ملک میں فساد کرنے کو دوڑتے پھریں ان کی سزا یہی ہے کہ قتل کر دیئے جائیں یا سولی چڑھا دیئے جائیں یا ان کے ایک ایک طرف کے ہاتھ اور ایک ایک طرف کے پاؤں کاٹ دیئے جائیں یا ملک سے نکال دیئے جائیں۔ یہ تو دنیا میں ان کی رسوائی ہے اور آخرت میں ان کے لئے بڑا عذاب (تیار) ہے۔

ہاں جن لوگوں نے اس سے پیشتر کہ تمہارے قابو میں آ جائیں توبہ کر لی تو جان رکھو کہ خدا بخشنے والا مہربان ہے۔

اے ایمان والو! خدا سے ڈرتے رہو اور اس کا قرب تلاش کرو اور اس کے رستے میں جہاد کرو تاکہ بخشے جاؤ۔

جو لوگ کافر ہیں اگر ان کے پاس وہ سب (مال و متاع) ہو جو زمین میں ہے اور اس کے ساتھ اتنا ہی اور ہو تاکہ اس کو دے کر قیامت کے عذاب سے چھوٹ جائیں تو ان سے قبول نہیں کیا جائے گا اور ان کو درد دینے والا عذاب ہوگا۔

وہ چاہیں گے کہ دوزخ سے نکل جائیں لیکن اس سے نہیں نکل سکیں گے۔ اور ان کے لئے ہمیشہ کا عذاب ہے۔

اور چوری کرنے والا مرد اور چوری کرنے والی عورت ان دونوں کے ہاتھ کاٹ دو۔ یہ ان کے کرتوتوں کا بدلہ ہے اور خدا کی طرف سے عبرت ناک سزا۔ اور خدا زبردست حکمت والا ہے۔

پھر جو اپنے گناہ کے بعد توبہ کر لے اور (چال چلن) درست کر لے تو خدا اس کو معاف کر دے گا۔ بیشک خدا بخشنے والا مہربان ہے۔

کیا تم کو معلوم نہیں کہ آسمانوں اور زمین کی بادشاہت خدا ہی کی ہے۔ وہ جسے چاہے عذاب کرے اور جسے چاہے بخش دے۔ اور خدا ہر چیز پر قادر ہے۔

اے پیغمبر! جو لوگ کفر میں جلدی کرتے ہیں ان (کی وجہ) سے غم نہ کھانا (یہ وہ لوگ ہیں) جو منہ سے تو کہتے ہیں کہ ہم ایمان لائے مگر ان کے دل ایمان نہیں لائے۔ اور اسی طرح جو یہودی ہیں (وہ بھی) جاسوسی کرنے کے لئے جھوٹ باتیں سنا کرتے ہیں اور تم سے نہ ملنے والے دوسرے لوگوں کی (خاطر) سنتے ہیں۔ کلام اللہ کو اس کے مقامات سے بدل دیتے ہیں۔ اور (اپنے لوگوں سے) کہتے ہیں کہ اگر تم کو یہی (حکم) دیا جائے تو لے لینا اور اگر یہ نہ دیا جائے تو (قبول کرنے سے) بچنا۔ اور جس کو خدا گمراہ کرنا چاہے تو اس کے لئے تم خدا سے کچھ (ہدایت) نہیں لے سکو گے۔ یہی وہ لوگ ہیں جن کے دلوں کو خدا نے پاک کرنا نہیں چاہا۔ ان کے لئے دنیا میں بھی رسوائی ہے اور آخرت میں بھی بڑا عذاب ہے۔

یہ جھوٹ کے سننے والے اور حرام کے کھانے والے ہیں اگر یہ تمہارے پاس آئیں تو ان میں فیصلہ کر دو یا ان سے منہ پھیر لو۔ اور اگر تم ان سے منہ پھیر لو گے تو وہ تمہارا کچھ نہیں بگاڑ سکیں گے۔ اور اگر فیصلہ کرو تو انصاف کا فیصلہ کرو۔ کہ خدا انصاف کرنے والوں کو دوست رکھتا ہے۔

اور یہ تم سے کیونکر فیصلہ کرائیں گے جبکہ خود ان کے پاس تورات موجود ہے جس میں خدا کا حکم (لکھا ہوا) ہے پھر اس کے بعد یہ (اس سے) پھر جاتے ہیں اور یہ لوگ ایمان ہی نہیں رکھتے۔

بیشک ہم نے تورات نازل فرمائی جس میں ہدایت اور روشنی ہے۔ اسی کے مطابق انبیاء جو (خدا کے) فرمانبردار تھے یہودیوں کو حکم دیتے رہے ہیں اور مشائخ اور علماء بھی کیونکہ وہ کتاب خدا کے نگہبان مقرر کئے گئے تھے اور اس پر گواہ تھے۔ تو تم لوگوں سے مت ڈرنا اور مجھی سے ڈرتے رہنا اور میری آیتوں کے بدلے تھوڑی سی قیمت نہ لینا۔ اور جو خدا کے نازل فرمائے ہوئے احکام کے مطابق حکم نہ دے تو ایسے ہی لوگ کافر ہیں۔

اور ہم نے ان پر تورات میں یہ حکم لکھ دیا تھا کہ جان کے بدلے جان اور آنکھ کے بدلے آنکھ اور ناک کے بدلے ناک اور کان کے بدلے کان اور دانت کے بدلے دانت اور سب زخموں کا اسی طرح بدلہ ہے۔ لیکن جو شخص بدلہ معاف کر دے تو وہ اس کے لئے کفارہ ہوگا۔ اور جو خدا کے نازل فرمائے ہوئے احکام کے مطابق حکم نہ دے تو ایسے ہی لوگ ظالم ہیں۔

اور ہم نے ان پیغمبروں کے بعد ان کے قدموں پر عیسیٰ بن مریم کو بھیجا جو اپنے سے پہلے کی کتاب تورات کی تصدیق کرتے تھے اور ان کو انجیل عنایت کی جس میں ہدایت اور نور ہے اور تورات کی جو اس سے پہلی کتاب (ہے) تصدیق کرتی ہے اور پرہیزگاروں کو راہ بتاتی اور نصیحت کرتی ہے۔

اور چاہئے کہ اہل انجیل اس حکم کے مطابق فیصلہ کیا کریں جو خدا نے اس میں نازل فرمایا ہے۔ اور جو خدا کے نازل کئے ہوئے حکم کے مطابق فیصلہ نہ کرے تو ایسے ہی لوگ نافرمان ہیں۔

اور (اے پیغمبر!) ہم نے تم پر سچی کتاب نازل کی ہے جو اپنے سے پہلی کتابوں کی تصدیق کرتی ہے اور ان پر نگہبان ہے تو جو حکم خدا نے نازل فرمایا ہے اس کے مطابق ان کا فیصلہ کرنا۔ اور حق جو تمہارے پاس آ چکا ہے اس کو چھوڑ کر ان کی خواہشوں کی پیروی نہ کرنا۔ تم میں سے ہر ایک کے لئے ہم نے ایک دستور اور طریقہ مقرر کیا ہے۔ اور اگر خدا چاہتا تو سب کو ایک ہی شریعت پر کر دیتا مگر جو حکم اس نے تم کو دیئے ہیں ان میں وہ تمہاری آزمائش کرنی چاہتا ہے۔ سو نیک کاموں میں جلدی کیا کرو۔ تم سب کو خدا کی طرف لوٹ کر جانا ہے۔ پھر جن باتوں میں تم اختلاف کیا کرتے تھے وہ تم کو بتا دے گا۔

اور یہ کہ جو حکم خدا نے نازل فرمایا ہے اسی کے مطابق ان کا فیصلہ کرنا اور ان کی خواہشوں کی پیروی نہ کرنا اور ان سے بچتے رہنا کہ مبادا وہ کسی حکم سے جو خدا نے تم پر نازل فرمایا ہے تم کو بہکا دیں۔ اگر یہ منہ پھیر لیں تو جان لو کہ خدا چاہتا ہے کہ ان کے بعض گناہوں کے سبب ان پر مصیبت ڈالے۔ اور اکثر لوگ نافرمان ہیں۔

کیا یہ جاہلیت کا فیصلہ چاہتے ہیں؟ اور یقین رکھنے والوں کے لئے خدا سے بہتر فیصلہ کرنے والا کون ہے؟