اے ایمان والو! ایسی باتیں مت پوچھو کہ اگر تم پر ظاہر کر دی جائیں تو تمہیں بری لگیں اور اگر تم ان کے بارے میں ایسے وقت سوال کرو گے جب قرآن نازل ہو رہا ہو تو وہ تم پر ظاہر کر دی جائیں گی۔ اللہ نے ان سے درگزر فرمایا، اور اللہ بخشنے والا بردبار ہے۔

بے شک تم سے پہلے ایک قوم نے بھی ایسے سوال کیے تھے پھر (ان کا جواب سن کر) ان سے منکر ہو گئے۔

اللہ نے نہ تو بحیرہ مقرر کیا ہے اور نہ سائبہ اور نہ وصیلہ اور نہ حام۔ لیکن کافر اللہ پر جھوٹ افترا کرتے ہیں اور ان میں سے اکثر عقل نہیں رکھتے۔

اور جب ان سے کہا جاتا ہے کہ جو (کتاب) اللہ نے نازل فرمائی ہے اس کی طرف اور پیغمبر کی طرف رجوع کرو تو کہتے ہیں کہ جس طریق پر ہم نے اپنے باپ دادا کو پایا ہے وہی ہمیں کافی ہے۔ بھلا اگرچہ ان کے باپ دادا کچھ بھی نہ جانتے ہوں اور نہ سیدھے راستے پر ہوں (تب بھی وہ انہی کی پیروی کریں گے؟)

اے ایمان والو! اپنی خبر لو۔ جب تم ہدایت پر ہو تو کوئی گمراہ تمہیں نقصان نہیں پہنچا سکتا۔ اللہ ہی کی طرف تم سب کو لوٹ کر جانا ہے پھر وہ تمہیں بتائے گا کہ تم کیا کرتے رہے ہو۔

اے ایمان والو! جب تم میں سے کسی کی موت کا وقت آ جائے تو وصیت کے وقت تم میں سے دو دیانت دار آدمی گواہ ہونے چاہئیں یا اگر تم سفر کر رہے ہو اور تمہیں موت کی مصیبت آ پہنچے تو غیروں میں سے دو شخص گواہ بنا لیے جائیں۔ اگر تمہیں شک ہو تو نماز کے بعد دونوں کو روک لو اور وہ اللہ کی قسم کھائیں کہ ہم اس کے بدلے کوئی قیمت نہیں لینا چاہتے اگرچہ ہمارا قریبی رشتہ دار ہی ہو اور نہ ہم اللہ کی گواہی کو چھپائیں گے، اگر ایسا کریں تو ہم گناہگاروں میں ہیں۔

پھر اگر معلوم ہو کہ وہ دونوں (گواہ جھوٹ بول کر) گناہ کے مرتکب ہوئے ہیں تو جن لوگوں کا حق مارنا چاہتے تھے ان میں سے ان کی جگہ دو اور شخص کھڑے ہوں جو سب سے زیادہ حقدار ہیں پھر وہ اللہ کی قسم کھائیں کہ ہماری گواہی ان کی گواہی سے زیادہ سچی ہے اور ہم نے کوئی زیادتی نہیں کی، اگر ایسا کریں تو ہم ظالموں میں سے ہیں۔

یہ طریقہ اس بات کے قرین ہے کہ یہ لوگ ٹھیک طور پر گواہی دیں یا اس بات سے ڈر جائیں کہ (ہماری) قسموں کے بعد (وارثوں سے) قسمیں لی جائیں گی، اور اللہ سے ڈرو اور (اس کا حکم) سنو۔ اور اللہ نافرمان لوگوں کو ہدایت نہیں دیتا۔

(اس دن سے ڈرو) جس دن اللہ پیغمبروں کو جمع کرے گا پھر پوچھے گا کہ تمہیں کیا جواب ملا تھا؟ وہ کہیں گے کہ ہمیں کچھ معلوم نہیں، بے شک تو ہی غیب کی باتوں سے واقف ہے۔

جب اللہ فرمائے گا کہ اے عیسیٰ ابن مریم! میرے ان احسانوں کو یاد کرو جو میں نے تم پر اور تمہاری والدہ پر کیے، جب میں نے روح القدس سے تمہاری مدد کی تم لوگوں سے (ماں کی) گود میں اور بڑی عمر میں (یکساں) گفتگو کرتے تھے اور جب میں نے تم کو کتاب اور دانائی اور تورات اور انجیل سکھائی اور جب تم میرے حکم سے مٹی سے پرندے کی سی مورت بناتے پھر اس میں پھونک مارتے تو وہ میرے حکم سے (سچ مچ) پرندہ بن جاتی اور تم مادر زاد اندھے اور کوڑھی کو میرے حکم سے اچھا کر دیتے تھے اور جب تم مردوں کو میرے حکم سے (زندہ کر کے) نکال کھڑا کرتے تھے اور جب میں نے بنی اسرائیل کو تم سے روک دیا جب تم ان کے پاس کھلے کھلے نشان لے کر آئے تو جو ان میں سے کافر تھے وہ کہنے لگے کہ یہ تو صریح جادو ہے۔

اور جب میں نے حواریوں کی طرف وحی بھیجی کہ مجھ پر اور میرے پیغمبر پر ایمان لاؤ۔ وہ بولے کہ ہم ایمان لائے اور تو گواہ رہنا کہ ہم (تیرے) فرمانبردار ہیں۔

(وہ قصہ بھی یاد کرو) جب حواریوں نے کہا کہ اے عیسیٰ ابن مریم! کیا آپ کا پروردگار ایسا کر سکتا ہے کہ ہم پر آسمان سے (کھانے کا) خوان نازل فرمائے؟ انہوں نے کہا کہ اگر ایمان رکھتے ہو تو اللہ سے ڈرو۔

وہ بولے کہ ہماری یہ خواہش ہے کہ اس میں سے کھائیں اور ہمارے دل تسلی پائیں اور ہم جان لیں کہ آپ نے ہم سے سچ کہا ہے اور ہم اس پر گواہ رہیں۔

عیسیٰ ابن مریم نے دعا کی کہ اے اللہ! اے ہمارے پروردگار! ہم پر آسمان سے خوان نازل فرما کہ وہ ہمارے لیے یعنی ہمارے اگلوں اور پچھلوں کے لیے (خوشی کی) عید ہو اور تیری طرف سے ایک نشان۔ اور ہمیں رزق دے اور تو بہترین رزق دینے والا ہے۔

اللہ نے فرمایا کہ میں تم پر وہ (خوان) نازل تو فرما دیتا ہوں مگر جو اس کے بعد تم میں سے کفر کرے گا تو میں اسے ایسا عذاب دوں گا کہ اہل عالم میں سے کسی کو ایسا عذاب نہ دوں گا۔

اور (وہ وقت بھی یاد رکھنے کے لائق ہے) جب اللہ فرمائے گا کہ اے عیسیٰ ابن مریم! کیا تم نے لوگوں سے کہا تھا کہ خدا کے سوا مجھے اور میری والدہ کو معبود مقرر کرو؟ وہ کہیں گے کہ تو پاک ہے مجھے کب شایاں تھا کہ میں ایسی بات کہتا جس کا مجھے کچھ حق نہیں اگر میں نے ایسا کہا ہوگا تو تجھے معلوم ہوگا۔ جو بات میرے دل میں ہے تو اسے جانتا ہے اور جو تیرے نفس میں ہے اسے میں نہیں جانتا بے شک تو ہی غیب کی باتوں سے واقف ہے۔

میں نے ان سے کچھ نہیں کہا بجز اس کے جس کا تو نے مجھے حکم دیا تھا (وہ یہ) کہ اللہ کی عبادت کرو جو میرا بھی پروردگار ہے اور تمہارا بھی۔ اور جب تک میں ان میں رہا ان (کے حالات) کا نگراں رہا پھر جب تو نے مجھے اٹھا لیا تو تو ہی ان کا نگراں تھا اور تو ہر چیز سے خبردار ہے۔

اگر تو ان کو عذاب دے تو یہ تیرے بندے ہیں اور اگر بخش دے تو (تیری مہربانی ہے) بے شک تو غالب اور حکمت والا ہے۔

اللہ فرمائے گا کہ یہ وہ دن ہے کہ سچ بولنے والوں کو ان کی سچائی ہی فائدہ دے گی ان کے لیے باغات ہیں جن کے نیچے نہریں بہہ رہی ہیں وہ ان میں ہمیشہ ہمیشہ رہیں گے۔ اللہ ان سے خوش اور وہ اللہ سے خوش۔ یہ بڑی کامیابی ہے۔

آسمانوں اور زمین اور جو کچھ ان میں ہے سب پر اللہ ہی کی بادشاہی ہے۔ اور وہ ہر چیز پر قادر ہے۔