سب تعریف خدا ہی کو ہے جس نے آسمانوں اور زمین کو پیدا کیا اور اندھیرا اور اجالا بنایا۔ پھر بھی کافر (اور چیزوں کو) خدا کے برابر ٹھہراتے ہیں۔

وہی تو ہے جس نے تم کو مٹی سے پیدا کیا پھر (مرنے کا) ایک وقت مقرر کردیا۔ اور ایک مدت اس کے ہاں اور مقرر ہے۔ پھر بھی تم شک کرتے ہو۔

اور آسمانوں اور زمین میں وہی (ایک) خدا ہے۔ وہ تمہاری پوشیدہ اور ظاہر باتوں کو جانتا ہے اور تم جو عمل کرتے ہو ان سے واقف ہے۔

اور ان کے پاس ان کے پروردگار کی نشانیوں میں سے کوئی نشانی نہیں آتی مگر یہ اس سے منہ پھیر لیتے ہیں۔

تو جب ان کے پاس حق آیا تو اس کو جھٹلا دیا۔ سو ان کو اس چیز کے حالات (عنقریب) معلوم ہوجائیں گے جس کے ساتھ یہ ٹھٹھا کرتے ہیں۔

کیا انہوں نے نہیں دیکھا کہ ہم نے ان سے پہلے کتنی امتوں کو ہلاک کر مارا جن کے پاؤں ملک میں ایسے جمادیئے تھے کہ تمہارے پاؤں بھی ایسے نہیں جمائے اور ان پر آسمان سے لگاتار مینہ برسایا اور نہریں بنا دیں جو ان کے (مکانوں کے) نیچے بہہ رہی تھیں پھر ان کو ان کے گناہوں کے سبب ہلاک کردیا اور ان کے بعد اور امتیں پیدا کردیں۔

اور اگر ہم تم پر کاغذ میں لکھی ہوئی کتاب نازل کرتے اور یہ اسے اپنے ہاتھوں سے چھو بھی لیتے تو بھی جو کافر ہیں وہ یہی کہتے کہ یہ تو صریح جادو ہے۔

اور کہتے ہیں کہ ان پر (خدا کے ہاں سے) کوئی فرشتہ کیوں نازل نہیں ہوا۔ اور اگر ہم فرشتہ نازل کرتے تو کام ہی فیصل ہوجاتا پھر ان کو (ذرا بھی) مہلت نہ دی جاتی۔

اور اگر ہم پیغمبر کو فرشتہ بناتے تو اسے بھی مرد کی صورت میں بناتے اور جو شبہ اب کرتے ہیں اس وقت بھی یہی شبہ کرتے۔

اور تم سے پہلے بھی پیغمبروں کے ساتھ استہزاء ہوتا رہا ہے تو جو لوگ ان میں سے تمسخر کیا کرتے تھے ان کو اسی (عذاب) نے آ گھیرا جس کی وہ ہنسی اڑایا کرتے تھے۔

کہہ دو کہ ملک میں چلو پھرو اور دیکھو کہ جھٹلانے والوں کا انجام کیسا ہوا۔

ان سے پوچھو کہ جو کچھ آسمانوں اور زمین میں ہے (سب) کس کا ہے؟ کہہ دو کہ خدا کا ہے۔ اس نے اپنی ذات (پاک) پر رحم کو لازم کرلیا ہے۔ وہ تم سب کو قیامت کے دن جس (کے آنے) میں کچھ بھی شک نہیں ضرور جمع کرے گا۔ جن لوگوں نے اپنے تئیں نقصان میں ڈالا وہ ایمان نہیں لائیں گے۔

اور جو چیزیں رات اور دن میں بستی ہیں (سب) اسی کی ہیں اور وہ سنتا جانتا ہے۔

کہو کیا میں خدا کو چھوڑ کر کسی اور کو مددگار بناؤں کہ وہی تو آسمانوں اور زمین کا پیدا کرنے والا ہے اور وہی (سب کو) کھانا دیتا ہے اور خود کھانا نہیں کھاتا۔ کہہ دو کہ مجھے یہ حکم ہوا ہے کہ سب سے پہلے میں اسلام لاؤں اور (یہ بھی کہ) تم مشرکوں میں ہرگز نہ ہونا۔

کہہ دو کہ اگر میں اپنے پروردگار کی نافرمانی کروں تو مجھے بڑے دن کے عذاب کا ڈر لگتا ہے۔

جس شخص سے اس روز عذاب ٹال دیا گیا اس پر خدا نے بڑا رحم کیا اور یہ صریح کامیابی ہے۔

اور اگر خدا تمہیں کوئی سختی پہنچائے تو اس کے سوا اس کو کوئی دور کرنے والا نہیں اور اگر نعمت (اور راحت) عطا کرے تو (کوئی اس کو روکنے والا نہیں) وہ ہر چیز پر قادر ہے۔

اور وہ اپنے بندوں پر غالب ہے اور وہ دانا (اور) خبردار ہے۔

پوچھو کہ گواہی کے لحاظ سے کون چیز سب سے بڑی ہے۔ کہہ دو کہ خدا (ہی سب سے بڑا گواہ ہے وہی) میرے اور تمہارے درمیان گواہ ہے۔ اور یہ قرآن مجید مجھ پر اس لئے اتارا گیا ہے کہ اس کے ذریعے سے تم کو اور جس شخص تک یہ پہنچ سکے آگاہ کردوں۔ کیا تم لوگ اس بات کی گواہی دیتے ہو کہ خدا کے ساتھ اور بھی معبود ہیں۔ کہہ دو کہ میں تو گواہی نہیں دیتا۔ کہہ دو کہ وہی اکیلا معبود ہے۔ اور جن کو تم (اس کا) شریک بناتے ہو میں ان سے بیزار ہوں۔

جن لوگوں کو ہم نے کتاب دی ہے وہ ان (ہمارے پیغمبر) کو اس طرح پہچانتے ہیں جس طرح اپنے بیٹوں کو پہچانا کرتے ہیں۔ جنہوں نے اپنے تئیں نقصان میں ڈال رکھا ہے وہ ایمان نہیں لائیں گے۔

اور اس سے بڑھ کر ظالم کون ہوگا جو خدا پر جھوٹ افترا کرے یا اس کی آیتوں کو جھٹلائے۔ کچھ شک نہیں کہ ظالم لوگ نجات نہیں پائیں گے۔

اور جس دن ہم سب کو جمع کریں گے پھر مشرکوں سے پوچھیں گے کہ (آج) تمہارے وہ شریک کہاں ہیں جن کا تمہیں دعویٰ تھا۔

تو ان سے کچھ عذر نہ بن پڑے گا بجز اس کے کہ کہیں خدا کی قسم جو ہمارا پروردگار ہے ہم شریک نہیں بناتے تھے۔

دیکھو انہوں نے اپنے اوپر کیسا جھوٹ بولا اور جو افترا وہ کیا کرتے تھے سب ان سے جاتا رہا۔

اور ان میں سے بعض ایسے ہیں کہ تمہاری طرف کان لگاتے ہیں۔ اور ہم نے ان کے دلوں پر تو پردے ڈال دیئے ہیں کہ اس (قرآن) کو سمجھ نہ سکیں اور کانوں میں بوجھ (پیدا کردیا ہے کہ سن نہ سکیں)۔ اور اگر یہ تمام نشانیاں بھی دیکھ لیں تب بھی ان پر ایمان نہ لائیں۔ یہاں تک کہ جب تمہارے پاس تم سے بحث کرنے کو آتے ہیں تو جو کافر ہیں کہتے ہیں یہ تو صرف اگلے لوگوں کی کہانیاں ہیں۔

اور وہ (لوگوں کو) اس سے منع کرتے ہیں اور خود بھی اس سے دور رہتے ہیں۔ اور (نہیں سمجھتے کہ اس سے) اپنے آپ ہی کو ہلاک کر رہے ہیں اور شعور نہیں رکھتے۔

اور کاش تم (ان کو اس وقت) دیکھو جب یہ دوزخ کے کنارے کھڑے کئے جائیں گے اور کہیں گے کہ ہائے کیا اچھی بات ہو کہ ہم (دنیا میں) پھر لوٹا دیئے جائیں اور اپنے پروردگار کی آیتوں کی تکذیب نہ کریں اور مومن ہوجائیں۔

(یہ یہ باتیں اس لیے کہیں گے کہ) جو اعمال (بد) یہ پہلے چھپایا کرتے تھے وہ آج ان پر ظاہر ہو گئے ہیں۔ (اور اگر یہ دنیا میں بھیج دیئے جائیں) تو پھر وہی کام کرنے لگیں جن سے ان کو منع کیا گیا تھا (کہ یہ تو) یقیناً جھوٹے ہیں۔

اور یہ (کافر) کہتے ہیں کہ بس ہماری یہی دنیا کی زندگی ہے اور ہم دوبارہ اٹھائے نہیں جائیں گے۔

اور کاش تم (ان کو اس وقت) دیکھو جب یہ اپنے پروردگار کے سامنے کھڑے کئے جائیں گے اور وہ فرمائے گا کیا یہ (دوبارہ زندہ ہونا) حق نہیں ہے۔ تو کہیں گے کیوں نہیں اے ہمارے پروردگار (یہ حق ہے)۔ خدا فرمائے گا اب (تو مانتے ہو، اچھا) کفر کے بدلے عذاب کے مزے چکھو۔

جن لوگوں نے خدا کے روبرو حاضر ہونے کو جھٹلایا وہ خسارے میں پڑ گئے۔ یہاں تک کہ جب قیامت ان پر ناگہاں آ موجود ہوگی تو بول اٹھیں گے کہ ہائے اس تقصیر پر افسوس ہے جو ہم نے قیامت کے بارے میں کی۔ اور وہ اپنے (گناہوں کے) بوجھ اپنی پیٹھوں پر اٹھائے ہوں گے۔ دیکھو جو بوجھ یہ اٹھا رہے ہیں بہت برا ہے۔

اور دنیا کی زندگی تو کھیل اور تماشا ہے۔ اور بہت اچھا گھر تو آخرت کا ہے (یعنی) ان کے لئے جو ڈرتے ہیں۔ کیا تم سمجھتے نہیں۔

ہم کو معلوم ہے کہ جو بات یہ کہتے ہیں اس سے تمہیں رنج ہوتا ہے (مگر) یہ تمہاری تکذیب نہیں کرتے بلکہ ظالم خدا کی آیتوں کا انکار کرتے ہیں۔

اور تم سے پہلے بھی پیغمبر جھٹلائے گئے تو وہ تکذیب اور ایذا پر صبر کرتے رہے یہاں تک کہ ان کے پاس ہماری مدد پہنچ گئی۔ اور خدا کی باتوں کو کوئی بدلنے والا نہیں۔ اور تم کو پیغمبروں کے حالات پہنچ چکے ہیں۔

اور اگر ان کا منہ پھیر لینا تم پر شاق گزرتا ہے تو اگر طاقت ہو تو زمین میں کوئی سرنگ ڈھونڈ نکالو یا آسمان میں سیڑھی (تلاش کرو) پھر ان کے پاس کوئی معجزہ لاؤ۔ اور اگر خدا چاہتا تو سب کو ہدایت پر جمع کردیتا سو تم ہرگز نادانوں میں نہ ہونا۔

(بات یہ ہے کہ) مانتے وہی ہیں جو سنتے بھی ہیں اور مردوں کو تو خدا (قیامت ہی کو) اٹھائے گا پھر اسی کی طرف لوٹ کر جائیں گے۔

اور کہتے ہیں کہ اس (پیغمبر) پر اس کے پروردگار کے ہاں سے کوئی نشانی (یعنی معجزہ) نازل نہیں ہوا۔ کہہ دو کہ خدا اس بات پر قادر ہے کہ نشانی نازل فرمائے لیکن ان میں اکثر نہیں جانتے۔

اور زمین میں کوئی چلنے والا اور نہ کوئی پرندہ جو اپنے بازوؤں سے اڑتا ہو مگر (یہ کہ) وہ تمہاری طرح کی جماعتیں ہیں۔ ہم نے کتاب میں کوئی چیز نہیں چھوڑی۔ پھر سب اپنے پروردگار کی طرف جمع کئے جائیں گے۔

اور جنہوں نے ہماری آیتوں کو جھٹلایا وہ اندھیروں میں بہرے اور گونگے (ہو رہے) ہیں۔ خدا جس کو چاہے گمراہ کرے اور جسے چاہے سیدھے رستے پر چلا دے۔

کہو کہ بھلا دیکھو تو اگر تم پر خدا کا عذاب آ جائے یا قیامت آ موجود ہو تو کیا تم (ایسی حالت میں) خدا کے سوا کسی اور کو پکارو گے؟ اگر تم سچے ہو (تو بتاؤ)۔

بلکہ (مصیبت کے وقت) تم اسی کو پکارتے ہو تو اگر وہ چاہتا ہے تو جس دکھ کے لئے اسے پکارتے ہو اس کو دور کردیتا ہے اور جن کو تم شریک بناتے ہو (اس وقت) انہیں بھول جاتے ہو۔

اور ہم نے تم سے پہلے بہت سی امتوں کی طرف پیغمبر بھیجے پھر ہم ان کو (نافرمانیوں کے سبب) سختیوں اور تکلیفوں میں پکڑتے رہے تاکہ وہ عاجزی کریں۔

تو جب ان پر ہمارا عذاب آتا رہا وہ کیوں نہیں عاجزی کرتے رہے؟ مگر ان کے تو دل ہی سخت ہوگئے تھے اور جو کام وہ کرتے تھے شیطان ان کو وہ آراستہ کر کر دکھاتا رہا۔

پھر جب انہوں نے اس نصیحت کو جو ان کو کی گئی تھی بھلا دیا تو ہم نے ان پر ہر چیز کے دروازے کھول دیئے یہاں تک کہ جب ان چیزوں سے جو ان کو دی گئی تھیں خوب خوش ہوگئے تو ہم نے ان کو ناگہاں پکڑ لیا اور وہ اس وقت مایوس ہوکر رہ گئے۔

غرض ظالم لوگوں کی جڑ کٹ گئی اور سب تعریف خدا ہی کے لئے ہے جو تمام جہان کا پروردگار ہے۔

(ان کافروں سے) کہو کہ بھلا دیکھو تو اگر خدا تمہارے کان اور آنکھیں چھین لے اور تمہارے دلوں پر مہر لگا دے تو خدا کے سوا کون سا معبود ہے جو تمہیں یہ نعمتیں پھر بخشے؟ دیکھو ہم کس کس طرح اپنی آیتیں بیان کرتے ہیں پھر بھی یہ روگردانی کرتے ہیں۔

کہو کہ بھلا بتاؤ تو اگر تم پر خدا کا عذاب ناگہاں یا ظاہر بظاہر آجائے تو کیا ظالم لوگوں کے سوا کوئی اور بھی ہلاک ہوگا؟

اور ہم پیغمبروں کو صرف خوشخبری سنانے اور ڈرانے کے لئے بھیجتے ہیں۔ تو جو ایمان لایا اور نیکوکار ہوگیا تو ایسے لوگوں کو نہ کچھ خوف ہوگا اور نہ وہ غمگین ہوں گے۔

اور جنہوں نے ہماری آیتوں کو جھٹلایا ان کی نافرمانیوں کے سبب انہیں عذاب ہو کر رہے گا۔

کہہ دو کہ میں تم سے یہ نہیں کہتا کہ میرے پاس خدا کے خزانے ہیں اور نہ (یہ کہ) میں غیب جانتا ہوں اور نہ تم سے یہ کہتا ہوں کہ میں فرشتہ ہوں۔ میں تو صرف اس حکم پر چلتا ہوں جو مجھے (خدا کی طرف سے) بھیجا جاتا ہے۔ کہہ دو کہ بھلا اندھا اور آنکھ والا برابر ہوتے ہیں؟ تو پھر تم غور کیوں نہیں کرتے؟