الم (یہ حروف مقطعات ہیں، ان کے معنی اللہ ہی بہتر جانتا ہے)۔

اللہ وہ معبودِ برحق ہے کہ اس کے سوا کوئی عبادت کے لائق نہیں، زندہ ہے، (سب کو) تھامنے والا ہے۔

اس نے (اے محمدﷺ) تم پر سچی کتاب نازل کی جو پہلے (نازل شدہ) کتابوں کی تصدیق کرتی ہے اور اسی نے تورات اور انجیل نازل کی۔

اس سے پہلے لوگوں کی ہدایت کے لیے، اور (حق و باطل کا) فیصلہ کرنے والی چیز اتاری۔ بے شک جو لوگ خدا کی آیتوں کے منکر ہیں ان کو سخت عذاب ہوگا اور خدا زبردست ہے بدلہ لینے والا۔

اللہ (ایسا خبیر و بصیر ہے کہ) اس پر کوئی چیز پوشیدہ نہیں (نہ) زمین میں اور نہ آسمان میں۔

وہی تو ہے جو (ماؤں کے) پیٹ میں جیسی چاہتا ہے تمہاری صورتیں بناتا ہے۔ اس زبردست حکمت والے کے سوا کوئی عبادت کے لائق نہیں۔

وہی ہے جس نے تم پر کتاب نازل کی جس میں بعض آیتیں محکم ہیں (جن کے معنی صاف اور ظاہر ہیں) وہ اصل کتاب ہیں اور دوسری متشابہ (جن کے معنی میں کئی احتمال ہیں)۔ تو جن لوگوں کے دلوں میں کجی ہے وہ ان میں سے ان (آیتوں) کے پیچھے لگ جاتے ہیں جو متشابہ ہیں تاکہ فتنہ برپا کریں اور ان کے اصل مطلب کی جستجو کریں۔ حالانکہ ان کے اصل معنی خدا کے سوا کوئی نہیں جانتا۔ اور جو لوگ علم میں پختہ ہیں وہ کہتے ہیں کہ ہم اس پر ایمان لائے۔ یہ سب ہمارے رب کی طرف سے ہے۔ اور نصیحت تو عقل مند ہی حاصل کرتے ہیں۔

اے ہمارے رب! جب تو نے ہمیں ہدایت عطا فرما دی ہے تو اس کے بعد ہمارے دلوں میں کجی پیدا نہ کر، اور ہمیں اپنے پاس سے رحمت عطا فرما، بے شک تو ہی بڑا عطا فرمانے والا ہے۔

اے ہمارے رب! تو اس دن (قیامت) سب لوگوں کو جمع کرنے والا ہے جس (کے آنے) میں کوئی شک نہیں۔ بے شک اللہ وعدہ خلافی نہیں کرتا۔

جو لوگ کافر ہوئے ان کے مال اور ان کی اولاد خدا (کے عذاب) کے مقابلے میں ان کے کچھ بھی کام نہ آئیں گے اور وہ آگ کا ایندھن ہیں۔

(ان کا حال) آلِ فرعون اور ان سے پہلے لوگوں کا سا ہے (کہ) انہوں نے ہماری آیتوں کو جھٹلایا تو خدا نے ان کے گناہوں کے سبب ان کو پکڑ لیا اور خدا سخت عذاب دینے والا ہے۔

(اے محمدﷺ!) کافروں سے کہہ دو کہ تم عنقریب مغلوب ہو جاؤ گے اور جہنم کی طرف جمع کیے جاؤ گے، اور وہ برا ٹھکانا ہے۔

تمہارے لئے ان دو گروہوں میں جو (بدر کے دن) آپس میں بھڑ گئے ایک نشانی تھی۔ ایک گروہ خدا کی راہ میں لڑ رہا تھا اور دوسرا کافر تھا وہ ان (مومنوں) کو اپنی آنکھوں سے اپنے سے دگنا دیکھ رہے تھے اور خدا اپنی مدد سے جسے چاہتا ہے تقویت دیتا ہے۔ بے شک اس میں آنکھوں والوں کے لئے عبرت ہے۔

لوگوں کے لئے مرغوبات کی محبت خوشنما بنا دی گئی ہے (یعنی) عورتیں اور بیٹے اور سونے اور چاندی کے جمع کیے ہوئے خزانے اور نشان لگے ہوئے گھوڑے اور مویشی اور کھیتی۔ یہ سب دنیا کی زندگی کا سامان ہے اور اللہ کے پاس اچھا ٹھکانا ہے۔

(اے پیغمبر!) کہہ دو کہ کیا میں تم کو ان چیزوں سے بہتر چیز بتاؤں؟ (سنو) جو لوگ پرہیزگار ہیں ان کے لئے ان کے رب کے پاس باغات ہیں جن کے نیچے نہریں بہہ رہی ہیں وہ ان میں ہمیشہ رہیں گے اور پاکیزہ بیویاں اور اللہ کی خوشنودی۔ اور اللہ بندوں کو دیکھ رہا ہے۔

جو کہتے ہیں کہ اے ہمارے رب! ہم ایمان لے آئے سو ہمارے گناہ معاف فرما اور ہمیں آگ کے عذاب سے بچا۔

وہ صبر کرنے والے اور سچ بولنے والے اور فرمانبرداری کرنے والے اور (خدا کی راہ میں) خرچ کرنے والے اور پچھلی رات میں بخشش مانگنے والے ہیں۔

اللہ نے گواہی دی کہ اس کے سوا کوئی عبادت کے لائق نہیں اور فرشتوں اور علم والوں نے بھی (گواہی دی کہ وہ) انصاف کے ساتھ قائم ہے۔ اس زبردست حکمت والے کے سوا کوئی عبادت کے لائق نہیں۔

بے شک اللہ کے نزدیک دین اسلام ہی ہے، اور جن لوگوں کو کتاب دی گئی انہوں نے علم آجانے کے بعد آپس کی ضد سے اختلاف کیا۔ اور جو اللہ کی آیتوں کا انکار کرے تو اللہ جلد حساب لینے والا ہے۔

پھر اگر یہ لوگ تم سے جھگڑیں تو کہہ دو کہ میں نے اپنا منہ (یعنی وجود) اللہ کے تابع کر دیا اور میرے پیروؤں نے بھی۔ اور اہل کتاب اور ان پڑھ لوگوں سے کہہ دو کہ کیا تم بھی اسلام لاتے ہو؟ اگر وہ اسلام لے آئیں تو ہدایت پا لیں، اور اگر منہ پھیر لیں تو تمہارا کام صرف پیغام پہنچا دینا ہے، اور اللہ بندوں کو دیکھ رہا ہے۔

جو لوگ اللہ کی آیتوں کا انکار کرتے ہیں اور نبیوں کو ناحق قتل کرتے ہیں اور جو لوگ انصاف کرنے کا حکم دیتے ہیں انہیں بھی مار ڈالتے ہیں، تو ان کو دکھ دینے والے عذاب کی خوشخبری سنا دو۔

یہ وہ لوگ ہیں جن کے اعمال دنیا اور آخرت میں اکارت گئے اور ان کا کوئی مددگار نہیں۔

کیا تم نے ان لوگوں کو نہیں دیکھا جنہیں کتاب سے ایک حصہ دیا گیا ہے؟ وہ اللہ کی کتاب کی طرف بلائے جاتے ہیں تاکہ وہ ان میں فیصلہ کرے پھر ان میں سے ایک جماعت منہ پھیر لیتی ہے اور وہ روگردانی کرنے والے ہیں۔

یہ اس لیے کہ وہ کہتے ہیں کہ ہمیں گنتی کے چند دنوں کے سوا آگ نہیں چھوئے گی، اور ان کی من گھڑت باتوں نے ان کو ان کے دین کے بارے میں دھوکے میں ڈال رکھا ہے۔

تو اس دن (ان کا) کیا حال ہوگا جب ہم ان کو جمع کریں گے جس (کے آنے) میں کچھ بھی شک نہیں، اور ہر شخص کو اس کے اعمال کا پورا پورا بدلہ دیا جائے گا اور ان پر ظلم نہیں کیا جائے گا۔

کہہ دو کہ اے اللہ! بادشاہی کے مالک! تو جسے چاہے بادشاہی بخشے اور جس سے چاہے بادشاہی چھین لے اور جسے چاہے عزت دے اور جسے چاہے ذلیل کرے، تیرے ہی ہاتھ میں ہر طرح کی بھلائی ہے۔ بے شک تو ہر چیز پر قادر ہے۔

تو ہی رات کو دن میں داخل کرتا ہے اور دن کو رات میں داخل کرتا ہے، اور تو ہی بے جان سے جاندار پیدا کرتا ہے اور جاندار سے بے جان پیدا کرتا ہے اور جسے چاہتا ہے بے حساب رزق دیتا ہے۔

مومنوں کو چاہیے کہ مومنوں کے سوا کافروں کو دوست نہ بنائیں، اور جو ایسا کرے گا اس کا اللہ سے کوئی تعلق نہیں، ہاں اگر تم ان (کے شر) سے بچنا چاہو (تو اور بات ہے)۔ اور اللہ تم کو اپنی ذات سے ڈراتا ہے اور اللہ ہی کی طرف لوٹ کر جانا ہے۔

کہہ دو کہ جو کچھ تمہارے سینوں میں ہے خواہ تم اسے چھپاؤ یا ظاہر کرو اللہ اسے جانتا ہے۔ اور جو کچھ آسمانوں اور جو کچھ زمین میں ہے وہ سب کو جانتا ہے۔ اور اللہ ہر چیز پر قادر ہے۔

جس دن ہر شخص اپنے اعمال کی نیکی کو موجود پالے گا اور ان برے کاموں کو بھی جو اس نے کیے ہوں گے تو آرزو کرے گا کہ کاش اس میں اور اس (نیکی) کے دن میں دور کا فاصلہ ہوتا۔ اور اللہ تم کو اپنی ذات سے ڈراتا ہے اور اللہ بندوں پر مہربان ہے۔

(اے پیغمبر لوگوں سے) کہہ دو کہ اگر تم اللہ سے محبت رکھتے ہو تو میری پیروی کرو اللہ بھی تم سے محبت کرے گا اور تمہارے گناہ معاف کر دے گا اور اللہ بخشنے والا مہربان ہے۔

کہہ دو کہ اللہ اور اس کے رسول کی اطاعت کرو، اگر وہ منہ پھیر لیں تو اللہ کافروں کو دوست نہیں رکھتا۔

بے شک اللہ نے آدمؑ اور نوحؑ اور خاندانِ ابراہیمؑ اور خاندانِ عمرانؑ کو سارے جہان پر فضیلت کے لیے منتخب کر لیا۔

یہ ایک نسل ہے جس میں ایک دوسرے کی اولاد ہے، اور اللہ سننے والا جاننے والا ہے۔

جب عمران کی بیوی نے کہا کہ اے میرے رب! جو بچہ میرے پیٹ میں ہے میں اسے تیرے نام آزاد کرتی ہوں، سو میری طرف سے قبول فرما۔ بے شک تو ہی سننے والا جاننے والا ہے۔

پھر جب ان کے ہاں بچہ پیدا ہوا تو کہنے لگیں کہ اے میرے مالک! میرے تو لڑکی ہوئی ہے، حالانکہ جو کچھ انہوں نے جنا تھا اللہ کو خوب معلوم تھا، اور (خدا کے نزدیک) لڑکا لڑکی جیسا نہیں ہوتا، اور میں نے اس کا نام مریم رکھا ہے اور میں اس کو اور اس کی اولاد کو شیطان مردود سے تیری پناہ میں دیتی ہوں۔

پس اس کے پروردگار نے اس کو اچھی طرح قبول فرمایا اور اسے عمدہ طریقہ سے پرورش کیا اور زکریاؑ کو اس کا سرپرست بنایا۔ جب زکریاؑ اس کے پاس عبادت گاہ میں جاتے تو اس کے پاس کھانا پاتے۔ پوچھتے کہ مریم! یہ کھانا تمہارے پاس کہاں سے آتا ہے؟ وہ کہتیں کہ اللہ کے پاس سے (آتا ہے)۔ بے شک اللہ جسے چاہتا ہے بے شمار رزق دیتا ہے۔

اس وقت زکریا نے اپنے رب سے دعا کی، کہا کہ اے میرے پروردگار! مجھے اپنے پاس سے پاکیزہ اولاد عطا فرما۔ بے شک تو دعا سننے والا ہے۔

تو فرشتوں نے انہیں آواز دی جبکہ وہ حجرے میں کھڑے نماز پڑھ رہے تھے کہ اللہ تمہیں یحییٰ کی خوشخبری دیتا ہے جو اللہ کے کلمے (یعنی عیسیٰ) کی تصدیق کریں گے اور سردار ہوں گے اور عورتوں سے رغبت نہ رکھنے والے اور (اللہ کے) نیک بندوں میں سے پیغمبر ہوں گے۔

زکریا نے کہا اے میرے پروردگار! میرے ہاں لڑکا کیونکر ہوگا جبکہ میں بوڑھا ہو گیا ہوں اور میری بیوی بانجھ ہے؟ فرمایا کہ اسی طرح اللہ جو چاہتا ہے کرتا ہے۔

زکریا نے کہا کہ اے میرے پروردگار! میرے لئے کوئی نشانی مقرر فرما۔ فرمایا نشانی یہ ہے کہ تم لوگوں سے تین دن تک اشارے کے سوا بات نہ کر سکو گے۔ اور (ان دنوں میں) اپنے رب کو کثرت سے یاد کرنا اور صبح و شام اس کی تسبیح کرنا۔

اور جب فرشتوں نے (مریم سے) کہا کہ اے مریم! اللہ نے تم کو برگزیدہ کیا ہے اور پاک بنایا ہے اور جہان کی عورتوں پر منتخب کیا ہے۔

اے مریم! اپنے پروردگار کی فرمانبرداری کرنا اور سجدہ کرنا اور رکوع کرنے والوں کے ساتھ رکوع کرنا۔

(اے پیغمبر!) یہ غیب کی خبریں ہیں جو ہم بذریعہ وحی تمہیں بتاتے ہیں، اور تم اس وقت ان کے پاس نہ تھے جب وہ اپنی قلمیں ڈال رہے تھے کہ ان میں سے کون مریم کا سرپرست بنے، اور نہ تم اس وقت ان کے پاس تھے جب وہ آپس میں جھگڑ رہے تھے۔

جب فرشتوں نے کہا اے مریم! اللہ تم کو اپنے پاس سے ایک کلمے کی بشارت دیتا ہے جس کا نام مسیح عیسیٰ ابن مریم ہوگا، وہ دنیا اور آخرت میں باآبرو اور (خدا کے) خاصوں میں سے ہوگا۔

اور وہ (گود میں) اور بڑی عمر کا ہو کر (یکساں) لوگوں سے باتیں کرے گا اور نیکوکاروں میں ہوگا۔

(مریم نے) کہا اے میرے پروردگار! میرے ہاں لڑکا کیونکر ہو گا حالانکہ مجھے کسی انسان نے چھوا تک نہیں۔ فرمایا کہ اللہ اسی طرح جو چاہتا ہے پیدا کرتا ہے۔ جب وہ کسی کام کا فیصلہ کرتا ہے تو اس کو یہی کہتا ہے کہ ہو جا تو وہ ہو جاتا ہے۔

اور اللہ اسے کتاب اور حکمت اور تورات اور انجیل سکھائے گا۔

اور وہ بنی اسرائیل کی طرف رسول ہوگا (اور کہے گا کہ) میں تمہارے پروردگار کی طرف سے نشانی لایا ہوں (وہ یہ) کہ تمہارے لئے مٹی سے پرندے کی شکل بناتا ہوں پھر اس میں پھونک مارتا ہوں تو وہ اللہ کے حکم سے پرندہ بن جاتی ہے۔ اور اللہ کے حکم سے مادرزاد اندھے اور کوڑھی کو تندرست کر دیتا ہوں اور مردوں کو زندہ کر دیتا ہوں۔ اور جو کچھ تم کھاتے ہو اور جو اپنے گھروں میں جمع کر رکھتے ہو سب تمہیں بتا دیتا ہوں۔ اگر تم صاحبِ ایمان ہو تو ان باتوں میں تمہارے لئے نشانی ہے۔

اور میں تورات کی تصدیق کرتا ہوں جو مجھ سے پہلے (نازل ہوئی) تھی اور (اس لیے بھی آیا ہوں) کہ بعض چیزیں جو تم پر حرام تھیں ان کو تمہارے لئے حلال کر دوں، اور میں تمہارے پاس تمہارے پروردگار کی طرف سے نشانی لے کر آیا ہوں تو اللہ سے ڈرو اور میرا کہا مانو۔