اے ایمان والو! یہود اور نصاریٰ کو دوست نہ بناؤ یہ ایک دوسرے کے دوست ہیں اور جو شخص تم میں سے ان کو دوست بنائے گا وہ بھی انہیں میں سے ہوگا بے شک خدا ظالم لوگوں کو ہدایت نہیں دیتا۔

تو تم دیکھو گے کہ جن لوگوں کے دلوں میں (نفاق کا) روگ ہے وہ دوڑ دوڑ کر ان میں گھسے جاتے ہیں اور کہتے ہیں کہ ہمیں خوف ہے کہ کہیں ہم پر زمانے کی گردش نہ آجائے۔ سو قریب ہے کہ خدا فتح بھیجے یا اپنے پاس سے کوئی اور امر (نازل فرمائے) تو جو بات یہ اپنے دلوں میں چھپاتے تھے اس پر پشیمان ہو کر رہ جائیں۔

اور مسلمان کہیں گے کہ کیا یہ وہی لوگ ہیں جو خدا کی سخت سخت قسمیں کھایا کرتے تھے کہ ہم تمہارے ساتھ ہیں ان کے عمل اکارت گئے اور وہ خسارے میں پڑ گئے۔

اے ایمان والو! اگر کوئی تم میں سے اپنے دین سے پھر جائے گا تو خدا ایسے لوگ پیدا کر دے گا جن کو وہ دوست رکھے گا اور وہ اس کو دوست رکھیں گے اور مومنوں کے حق میں نرمی کریں گے اور کافروں سے سختی سے پیش آئیں گے۔ خدا کی راہ میں جہاد کریں گے اور کسی ملامت کرنے والے کی ملامت سے نہ ڈریں گے۔ یہ خدا کا فضل ہے وہ جسے چاہتا ہے دیتا ہے اور خدا بڑی کشائش والا اور جاننے والا ہے۔

تمہارے دوست تو خدا اور اس کے پیغمبر اور مومن لوگ ہی ہیں جو نماز پڑھتے اور زکوٰۃ دیتے اور (خدا کے آگے) جھکتے ہیں۔

اور جو شخص خدا اور اس کے پیغمبر اور مومنوں سے دوستی کرے گا تو (وہ خدا کی جماعت میں داخل ہوگا اور) خدا کی جماعت ہی غلبہ پانے والی ہے۔

اے ایمان والو! جن لوگوں کو تم سے پہلے کتابیں دی گئی تھیں ان کو اور کافروں کو جنہوں نے تمہارے دین کو ہنسی اور کھیل بنا رکھا ہے دوست نہ بناؤ اور مومنو! خدا سے ڈرتے رہو۔

اور جب تم نماز کے لئے اذان دیتے ہو تو یہ اسے ہنسی اور کھیل بناتے ہیں یہ اس لئے کہ یہ بےعقل لوگ ہیں۔

کہو کہ اے اہل کتاب! تم ہم میں برائی کیا دیکھتے ہو؟ یہی نہ کہ ہم خدا پر اور جو (کتاب) ہم پر نازل ہوئی اس پر اور جو (کتابیں) پہلے نازل ہوئیں ان پر ایمان لائے ہیں اور یہ کہ تم میں اکثر بدکار ہیں۔

کہہ دو کہ میں تمہیں بتاؤں کہ خدا کے ہاں اس سے بھی بدتر جزا پانے والے کون ہیں؟ وہ جن پر خدا نے لعنت کی اور جن پر وہ غضب ناک ہوا اور جن کو ان میں سے بندر اور سور بنا دیا اور جنہوں نے شیطان کی پرستش کی۔ ایسے لوگوں کا برا ٹھکانا ہے اور وہ سیدھے راستے سے بہت دور ہیں۔

اور جب یہ لوگ تمہارے پاس آتے ہیں تو کہتے ہیں کہ ہم ایمان لے آئے حالانکہ کفر ہی (کو دل میں لئے ہوئے) آئے تھے اور اسی (کو لئے ہوئے) گئے اور جن باتوں کو یہ مخفی رکھتے ہیں خدا ان کو خوب جانتا ہے۔

اور تم ان میں سے اکثروں کو دیکھو گے کہ گناہ اور زیادتی اور حرام کھانے میں لپک رہے ہیں۔ بے شک یہ جو کچھ کرتے ہیں برا کرتے ہیں۔

بھلا مشائخ اور علما انہیں گناہ کی بات کہنے اور حرام مال کھانے سے منع کیوں نہیں کرتے؟ بے شک وہ برا کرتے ہیں۔

اور یہود کہتے ہیں کہ خدا کا ہاتھ (گردن سے) بندھا ہوا ہے (نہیں بلکہ) انہی کے ہاتھ باندھے جائیں اور ایسا کہنے کی وجہ سے ان پر لعنت ہو (خدا کا ہاتھ بندھا ہوا نہیں) بلکہ اس کے دونوں ہاتھ کھلے ہیں وہ جس طرح چاہتا ہے خرچ کرتا ہے اور (اے پیغمبر) یہ (کتاب) جو تمہارے پروردگار کی طرف سے تم پر نازل ہوئی ہے ان میں سے اکثر کی شرارت اور کفر اور بڑھے گا اور ہم نے ان کے باہم عداوت اور بغض قیامت تک کے لئے ڈال دیا ہے۔ یہ جب لڑائی کے لئے آگ جلاتے ہیں تو خدا اس کو بجھا دیتا ہے اور یہ ملک میں فساد کے لئے دوڑتے پھرتے ہیں اور خدا فساد کرنے والوں کو دوست نہیں رکھتا۔

اور اگر اہل کتاب ایمان لاتے اور پرہیزگاری کرتے تو ہم ان سے ان کے گناہ محو کر دیتے اور ان کو نعمت کے باغوں میں داخل کرتے۔

اور اگر وہ تورات اور انجیل کو اور جو (کتابیں) ان کے پروردگار کی طرف سے ان پر نازل ہوئیں ان کو قائم رکھتے تو ان پر اوپر سے (یعنی آسمان سے) اور پاؤں کے نیچے سے (یعنی زمین سے) رزق برستا۔ ان میں ایک جماعت میانہ رو ہے اور بہت سے ایسے ہیں جن کے اعمال برے ہیں۔

اے پیغمبر جو ارشادات خدا کی طرف سے تم پر نازل ہوئے ہیں سب لوگوں کو پہنچا دو اور اگر ایسا نہ کیا تو تم نے خدا کا پیغام نہیں پہنچایا اور خدا تم کو لوگوں سے محفوظ رکھے گا۔ بیشک خدا کافروں کو ہدایت نہیں دیتا۔

کہہ دو کہ اے اہل کتاب! جب تک تم تورات اور انجیل کو اور جو (کتابیں) تمہارے پروردگار کی طرف سے تم پر نازل ہوئیں ان کو قائم نہ رکھو گے کچھ راہ پر نہیں ہو سکتے۔ اور (اے پیغمبر) یہ (قرآن) جو تمہارے پروردگار کی طرف سے تم پر نازل ہوا ہے ان میں سے اکثر کی سرکشی اور کفر اور بڑھے گا تو تم کافروں کا کچھ غم نہ کرو۔

جو لوگ مسلمان ہیں یا یہودی یا صابی یا عیسائی جو کوئی بھی خدا اور روز آخرت پر ایمان لائے گا اور عمل نیک کرے گا تو ایسے لوگوں پر نہ کچھ خوف ہوگا اور نہ وہ غمگین ہوں گے۔

ہم نے بنی اسرائیل سے عہد بھی لیا اور ان کی طرف پیغمبر بھی بھیجے (لیکن) جب کوئی پیغمبر ان کے پاس ایسی باتیں لاتا جن کو ان کے دل نہیں چاہتے تھے تو وہ (انبیاء کی) ایک جماعت کو تو جھٹلا دیتے تھے اور ایک جماعت کو قتل کر دیتے تھے۔

اور خیال کرتے تھے کہ (اس سے) ان پر کوئی آفت نہیں آنے کی تو وہ اندھے اور بہرے بن گئے پھر خدا نے ان پر مہربانی فرمائی (پھر انہوں نے بدعمالیاں کیں تو) پھر ان میں سے اکثر اندھے اور بہرے ہو گئے اور جو کچھ یہ کرتے ہیں خدا اس کو دیکھ رہا ہے۔

وہ لوگ کافر ہیں جو کہتے ہیں کہ مریم کے بیٹے مسیح ہی خدا ہیں حالانکہ مسیح نے یہ فرمایا تھا کہ اے بنی اسرائیل! خدا ہی کی عبادت کرو جو میرا بھی پروردگار ہے اور تمہارا بھی۔ (اور جان رکھو کہ) جو شخص خدا کے ساتھ شرک کرے گا خدا اس پر بہشت حرام کر دے گا اور اس کا ٹھکانا دوزخ ہے اور ظالموں کا کوئی مددگار نہیں۔

وہ لوگ (بھی) کافر ہیں جو اس بات کے قائل ہیں کہ خدا تین میں کا تیسرا ہے۔ حالانکہ (اس) معبود یکتا کے سوا کوئی معبود نہیں اور اگر یہ لوگ اپنی باتوں سے باز نہ آئیں گے تو ان میں سے جو کافر رہیں گے ان کو الم ناک عذاب پہنچے گا۔

تو یہ کیوں خدا کے آگے توبہ نہیں کرتے اور اس سے بخشش نہیں مانگتے؟ اور خدا تو بخشنے والا مہربان ہے۔

مسیح ابن مریم تو صرف خدا کے پیغمبر تھے ان سے پہلے بھی بہت سے پیغمبر گزر چکے تھے۔ اور ان کی ماں ولیہ تھیں۔ دونوں (انسان تھے اور) کھانا کھایا کرتے تھے۔ دیکھو ہم ان کے (سمجھانے کے) لئے کیسی صاف صاف آیتیں بیان کرتے ہیں پھر دیکھو یہ کدھر الٹے جا رہے ہیں۔

کہو کہ کیا تم خدا کے سوا ایسی چیز کی پرستش کرتے ہو جو تمہارے نفع اور نقصان کا کچھ بھی اختیار نہیں رکھتی اور خدا ہی (سب کچھ) سنتا جانتا ہے۔

کہو کہ اے اہل کتاب اپنے دین کی بات میں ناحق مبالغہ نہ کرو اور ایسے لوگوں کی خواہشوں کے پیچھے نہ چلو جو پہلے گمراہ ہوچکے اور بہت سے لوگوں کو گمراہ کر چکے اور سیدھے راستے سے بھٹک گئے۔

بنی اسرائیل میں سے جن لوگوں نے کفر کیا ان پر داؤد اور عیسیٰ بن مریم کی زبان سے لعنت کی گئی۔ یہ اس لئے کہ وہ نافرمانی کرتے تھے اور حد سے تجاوز کرتے تھے۔

وہ برے کاموں سے جو وہ کرتے تھے ایک دوسرے کو روکتے نہیں تھے۔ بے شک وہ برا کرتے تھے۔

تم ان میں بہت سے لوگوں کو دیکھو گے کہ کافروں سے دوستی رکھتے ہیں۔ انہوں نے جو کچھ اپنے واسطے آگے بھیجا ہے برا ہے (وہ یہ) کہ خدا ان سے ناخوش ہوا اور وہ ہمیشہ عذاب میں (مبتلا) رہیں گے۔

اور اگر وہ خدا پر اور پیغمبر (آخرالزماں) پر اور جو کتاب ان پر نازل ہوئی تھی اس پر یقین رکھتے تو ان لوگوں کو دوست نہ بناتے۔ لیکن ان میں اکثر بدکردار ہیں۔

(اے پیغمبر) تم دیکھو گے کہ مومنوں کے ساتھ دشمنی کرنے میں سب سے زیادہ سخت یہودی اور مشرک ہیں اور دوستی کے لحاظ سے مومنوں کے قریب ان لوگوں کو پاؤ گے جو کہتے ہیں کہ ہم نصاریٰ ہیں۔ یہ اس لئے کہ ان میں عالم بھی ہیں اور مشائخ بھی اور وہ تکبر نہیں کرتے۔

اور جب اس (کتاب) کو سنتے ہیں جو (ہمارے) پیغمبر پر نازل ہوئی تو تم دیکھتے ہو کہ ان کی آنکھوں سے آنسو جاری ہو جاتے ہیں اس لئے کہ انہوں نے حق کو پہچان لیا ہے۔ اور وہ پکار اٹھتے ہیں کہ اے ہمارے پروردگار! ہم ایمان لے آئے تو ہم کو ماننے والوں میں لکھ لے۔

اور ہمیں کیا ہوا ہے کہ خدا پر اور حق بات پر جو ہمارے پاس آئی ہے ایمان نہ لائیں اور ہم امید رکھتے ہیں کہ ہمارا پروردگار ہم کو نیک بندوں کے ساتھ (بہشت میں) داخل کرے گا۔

تو خدا نے ان کو اس کہنے کے بدلے (بہشت کے) باغ عنایت کئے جن کے نیچے نہریں بہہ رہی ہیں وہ ان میں ہمیشہ رہیں گے۔ اور نیکوکاروں کا یہی بدلہ ہے۔

اور جن لوگوں نے کفر کیا اور ہماری آیتوں کو جھٹلایا وہ جہنمی ہیں۔

مومنو! جو پاکیزہ چیزیں خدا نے تمہارے لئے حلال کی ہیں ان کو حرام نہ کرو اور حد سے نہ بڑھو کہ خدا حد سے بڑھنے والوں کو دوست نہیں رکھتا۔

اور جو حلال اور طیب روزی خدا نے تم کو دی ہے اسے کھاؤ اور خدا سے جس پر ایمان رکھتے ہو ڈرتے رہو۔

خدا تمہاری لغو قسموں پر تم سے مواخذہ نہیں کرے گا لیکن جن قسموں کو تم نے قصدِ دلی سے کھایا ہو (اور پھر ان کو توڑ دو) تو ان پر مواخذہ کرے گا۔ تو اس کا کفارہ دس محتاجوں کو اوسط درجے کا کھانا کھلانا ہے جو تم اپنے اہل و عیال کو کھلاتے ہو یا ان کو کپڑے دینا یا ایک غلام آزاد کرنا اور جس کو (یہ) میسر نہ ہو تو تین روزے رکھے۔ یہ تمہاری قسموں کا کفارہ ہے جب تم قسم کھا لو (اور اسے توڑ دو) اور (تم کو) چاہئے کہ اپنی قسموں کی حفاظت کرو۔ اس طرح خدا تمہارے (سمجھانے کے) لئے اپنی آیتیں بیان فرماتا ہے تاکہ تم شکر کرو۔

اے ایمان والو! شراب اور جوا اور بت اور پانسا یہ سب ناپاک کام اعمال شیطان سے ہیں سو ان سے بچتے رہنا تاکہ نجات پاؤ۔

شیطان تو یہ چاہتا ہے کہ شراب اور جوئے کے سبب تمہارے آپس میں دشمنی اور رنجش ڈلوا دے اور تمہیں خدا کی یاد اور نماز سے روک دے۔ تو تم کو (ان کاموں سے) باز رہنا چاہئے۔

اور خدا کی فرمانبرداری کرو اور پیغمبر کے حکم پر چلو اور (ڈرتے اور) بچتے رہو۔ اگر تم منہ پھیرو گے تو جان رکھو کہ ہمارے پیغمبر کے ذمے تو صرف صاف صاف پہنچا دینا ہے۔

جو لوگ ایمان لائے اور نیک کام کرتے رہے ان پر ان چیزوں کا کچھ گناہ نہیں جو وہ کھا چکے (بشرطیکہ) جب وہ (حرام چیزوں سے) بچے اور ایمان لائے اور نیک کام کئے پھر (حرام سے) بچے اور ایمان لائے پھر (حرام سے) بچے اور نیکی کی۔ اور خدا نیکوکاروں کو دوست رکھتا ہے۔

مومنو! کسی قدر شکار سے جن تک تمہارے ہاتھ اور نیزے پہنچ سکیں خدا تمہاری آزمائش کرے گا تاکہ معلوم کرے کہ اس سے غائبانہ کون ڈرتا ہے۔ سو جو اس کے بعد زیادتی کرے گا اس کے لئے دکھ دینے والا عذاب ہے۔

مومنو! جب تم احرام کی حالت میں ہو تو شکار نہ مارنا۔ اور جو تم میں سے جان بوجھ کر اسے مارے تو (اس کا) بدلہ یہ ہے کہ جیسا جانور مارا ہو ویسا ہی جانور مویشیوں میں سے (دے جس کے) بارے میں تم میں سے دو عادل مرد فیصلہ کردیں (یہ) نذرانہ (ہو جو) کعبے پہنچایا جائے یا (اس کا) کفارہ یہ ہے کہ مسکینوں کو کھانا کھلا دیا جائے یا اس کے برابر روزے رکھے جائیں تاکہ اپنے کام کی سزا (کا مزہ) چکھ لے۔ جو پہلے ہو چکا وہ خدا نے معاف کر دیا۔ اور جو پھر (ایسا کام) کرے گا تو خدا اس سے بدلہ لے گا۔ اور خدا غالب (اور) بدلہ لینے والا ہے۔

تمہارے لئے دریا (کی چیزوں) کا شکار اور ان کا کھانا حلال کر دیا گیا ہے یعنی تمہارے اور مسافروں کے فائدے کے لئے (یہ اجازت دے دی گئی ہے) اور جنگل کا شکار جب تک تم احرام کی حالت میں رہو تم پر حرام ہے۔ اور خدا سے جس کے روبرو تم جمع کئے جاؤ گے ڈرتے رہو۔

خدا نے ادب والے گھر کعبہ کو لوگوں کے لئے قیام (اور امن) کا ذریعہ بنایا ہے اور عزت والے مہینے کو اور قربانی کو اور (ان جانوروں کو جن کے گلے میں) پٹے بندھے ہوں (سب کو ادب کا مقام ٹھہرایا ہے)۔ یہ اس لئے کہ تم جان لو کہ جو کچھ آسمانوں میں ہے اور جو کچھ زمین میں ہے خدا سب کو جانتا ہے اور یہ کہ خدا ہر چیز سے باخبر ہے۔

جان رکھو کہ خدا سخت عذاب دینے والا ہے اور یہ کہ خدا بخشنے والا مہربان بھی ہے۔

پیغمبر کے ذمے تو صرف پیغام کا پہنچا دینا ہے اور جو کچھ تم ظاہر کرتے ہو اور جو مخفی کرتے ہو خدا کو سب معلوم ہے۔

کہہ دو کہ ناپاک اور پاک برابر نہیں ہوتے اگرچہ ناپاک کی کثرت تمہیں اچھی ہی لگے۔ تو اے اہل عقل! خدا سے ڈرتے رہو تاکہ فلاح پاؤ۔