یہی لوگ حقیقت میں کافر ہیں اور ہم نے کافروں کے لئے رسوا کرنے والا عذاب تیار کر رکھا ہے۔

اور جو لوگ اللہ اور اس کے رسولوں پر ایمان لائے اور ان میں سے کسی میں فرق نہ کیا، ان کو وہ عنقریب ان کے صلے عطا فرمائے گا اور اللہ بخشنے والا مہربان ہے۔

اہل کتاب آپ سے درخواست کرتے ہیں کہ آپ ان پر آسمان سے ایک کتاب اتار لائیں۔ یہ موسیٰ سے اس سے بھی بڑی درخواست کر چکے ہیں، انہوں نے کہا تھا کہ ہمیں اللہ ظاہر بظاہر دکھا دو، تو ان کے ظلم کے سبب ان کو بجلی نے آپکڑا۔ پھر کھلی نشانیاں آنے کے بعد انہوں نے بچھڑے کو (معبود) بنا لیا، پھر ہم نے اسے بھی معاف کر دیا اور ہم نے موسیٰ کو کھلا غلبہ عطا فرمایا۔

اور ہم نے ان سے عہد لینے کے لئے کوہ طور کو ان پر اٹھایا اور انہیں حکم دیا کہ دروازے میں سجدہ کرتے ہوئے داخل ہونا اور یہ بھی حکم دیا کہ ہفتے کے دن (مچھلی کے شکار میں) حد سے تجاوز نہ کرنا اور ہم نے ان سے پختہ عہد لیا۔

پھر ان کی عہد شکنی کے سبب اور اللہ کی آیتوں کے انکار اور انبیاء کو ناحق قتل کرنے اور یہ کہنے کے سبب کہ ہمارے دلوں پر غلاف ہیں، (ہم نے ان پر لعنت کی) بلکہ ان کے کفر کے سبب اللہ نے ان کے دلوں پر مہر لگا دی ہے تو یہ کم ہی ایمان لاتے ہیں۔

اور ان کے کفر اور مریم پر بہت بڑا بہتان باندھنے کے سبب (ہم نے ان پر لعنت کی)۔

اور ان کے یہ کہنے کے سبب کہ ہم نے اللہ کے رسول مسیح عیسیٰ ابن مریم کو قتل کر دیا حالانکہ انہوں نے نہ ان کو قتل کیا اور نہ سولی پر چڑھایا بلکہ ان کو ان کی شبیہ بنا دی گئی اور جو لوگ ان کے بارے میں اختلاف کرتے ہیں وہ شک میں مبتلا ہیں، ان کو اس بات کا کچھ علم نہیں مگر صرف گمان کی پیروی کرنا اور انہوں نے عیسیٰ کو یقیناً قتل نہیں کیا۔

بلکہ اللہ نے ان کو اپنی طرف اٹھا لیا اور اللہ غالب حکمت والا ہے۔

اور کوئی اہل کتاب ایسا نہ ہوگا جو عیسیٰ کی موت سے پہلے ان پر ایمان نہ لے آئے اور قیامت کے دن وہ ان پر گواہ ہوں گے۔

غرض یہودیوں کے ان ظالمانہ افعال کے سبب اور اس سبب سے کہ وہ اکثر (لوگوں کو) اللہ کے راستے سے روکتے تھے، ہم نے بہت سی پاک چیزیں جو ان کے لئے حلال تھیں، ان پر حرام کر دیں۔

اور ان کے سود لینے کے سبب حالانکہ انہیں اس سے منع کیا گیا تھا اور لوگوں کا مال ناحق کھانے کے سبب (یہ پابندیاں لگائی گئیں) اور ان میں سے جو کافر ہیں ان کے لیے ہم نے دردناک عذاب تیار کر رکھا ہے۔

لیکن ان میں سے جو لوگ علم میں پکے ہیں اور جو مومن ہیں وہ اس (کتاب) پر جو آپ پر نازل ہوئی اور اس پر جو آپ سے پہلے نازل ہوئی ایمان لاتے ہیں اور نماز قائم کرنے والے ہیں اور زکوٰۃ ادا کرنے والے ہیں اور اللہ اور قیامت کے دن پر ایمان رکھنے والے ہیں، یہی لوگ ہیں جن کو ہم بڑا ثواب دیں گے۔

ہم نے آپ پر اسی طرح وحی بھیجی ہے جیسے نوح اور ان سے پچھلے نبیوں پر بھیجی تھی اور ہم نے ابراہیم اور اسمٰعیل اور اسحٰق اور یعقوب اور اولاد یعقوب اور عیسیٰ اور ایوب اور یونس اور ہارون اور سلیمان پر بھی وحی بھیجی اور داؤد کو زبور عطا کی۔

اور بہت سے رسول ہیں جن کے حالات ہم اس سے پیشتر آپ کو سنا چکے ہیں اور بہت سے رسول ہیں جن کے حالات ہم نے آپ کو نہیں سنائے اور موسیٰ سے اللہ نے (بلا واسطہ) گفتگو فرمائی۔

یہ سب رسول خوشخبری سنانے والے اور ڈرانے والے تھے تاکہ رسولوں کے آنے کے بعد لوگوں کے لئے اللہ پر کوئی عذر باقی نہ رہے اور اللہ زبردست حکمت والا ہے۔

لیکن اللہ گواہی دیتا ہے اس (کتاب) کی جو اس نے آپ پر نازل کی، کہ اس نے اپنے علم سے نازل کی ہے اور فرشتے بھی گواہی دیتے ہیں اور گواہی کے لیے اللہ ہی کافی ہے۔

جن لوگوں نے کفر کیا اور (لوگوں کو) اللہ کے راستے سے روکا، وہ راستے سے بھٹک کر دور جا پڑے۔

بے شک جن لوگوں نے کفر کیا اور ظلم کرتے رہے، اللہ ان کو ہرگز نہیں بخشے گا اور نہ ہی انہیں راستہ دکھائے گا۔

مگر دوزخ کا راستہ کہ اس میں ہمیشہ ہمیشہ رہیں گے اور یہ (کام) اللہ کے لئے آسان ہے۔

اے لوگو! تمہارے پاس تمہارے پروردگار کی طرف سے حق آچکا ہے سو تم ایمان لے آؤ، (یہی) تمہارے حق میں بہتر ہے اور اگر کفر کرو گے تو (اللہ کا کچھ نہیں بگاڑو گے کیونکہ) جو کچھ آسمانوں اور زمین میں ہے سب اللہ ہی کا ہے اور اللہ سب کچھ جاننے والا حکمت والا ہے۔

اے اہل کتاب! اپنے دین میں حد سے نہ بڑھو اور اللہ کی شان میں حق بات کے سوا کچھ نہ کہو۔ مسیح عیسیٰ ابن مریم تو صرف اللہ کے رسول اور اس کا کلمہ تھے جو اس نے مریم کی طرف ڈالا تھا اور اس کی طرف سے ایک روح تھے۔ سو تم اللہ اور اس کے رسولوں پر ایمان لاؤ اور یہ نہ کہو کہ (اللہ) تین ہیں، اس سے باز آجاؤ کہ یہی تمہارے لئے بہتر ہے۔ اللہ تو صرف ایک ہی معبود ہے۔ وہ پاک ہے اس سے کہ اس کی اولاد ہو، جو کچھ آسمانوں میں اور جو کچھ زمین میں ہے سب اسی کا ہے اور اللہ ہی کارساز کافی ہے۔

مسیح تو اس بات سے ہرگز عار نہ کریں گے کہ وہ اللہ کے بندے ہوں اور نہ مقرب فرشتے (اس سے عار کرتے ہیں) اور جو شخص اللہ کی عبادت سے عار کرے اور تکبر کرے تو وہ عنقریب ان سب کو اپنے پاس جمع کرے گا۔

سو جو لوگ ایمان لائے اور نیک عمل کیے ان کو وہ ان کا پورا پورا ثواب دے گا اور اپنے فضل سے کچھ زیادہ بھی عطا فرمائے گا اور جنہوں نے عار کی اور تکبر کیا ان کو دردناک عذاب دے گا اور وہ اللہ کے سوا اپنا نہ کوئی حمایتی پائیں گے اور نہ مددگار۔

اے لوگو! تمہارے پاس تمہارے پروردگار کی طرف سے دلیل آچکی ہے اور ہم نے تمہاری طرف چمکتا ہوا نور بھیجا ہے۔

سو جو لوگ اللہ پر ایمان لائے اور اس (کے دین) کو مضبوط پکڑا، ان کو وہ اپنی رحمت اور فضل میں داخل کرے گا اور اپنی طرف (پہنچنے کا) سیدھا راستہ دکھائے گا۔

لوگ آپ سے (کلالہ کے بارے میں) فتویٰ پوچھتے ہیں۔ کہہ دیجئے کہ اللہ تم کو کلالہ کے بارے میں حکم دیتا ہے کہ اگر کوئی شخص مر جائے اور اس کی اولاد نہ ہو اور ایک بہن ہو تو اس کو بھائی کے ترکے میں سے آدھا ملے گا اور (اگر بہن مر جائے اور اس کی اولاد نہ ہو تو) بھائی اس کا وارث ہوگا اور اگر (مرنے والے بھائی کی) دو بہنیں ہوں تو ان کو ترکے کا دو تہائی ملے گا اور اگر بھائی اور بہنیں یعنی مرد اور عورتیں ملے جلے وارث ہوں تو مرد کا حصہ دو عورتوں کے حصے کے برابر ہے۔ اللہ تم سے (یہ احکام اس لئے) کھول کھول کر بیان فرماتا ہے کہ تم بھٹکتے نہ پھرو اور اللہ ہر چیز سے واقف ہے۔