وہ آسمانوں اور زمین کا موجد ہے۔ اس کا کوئی بیٹا کیسے ہوسکتا ہے حالانکہ اس کی کوئی بیوی نہیں، اور اسی نے ہر چیز کو پیدا کیا، اور وہ ہر چیز کا خوب جاننے والا ہے۔

یہی اللہ تمہارا رب ہے، اس کے سوا کوئی معبود نہیں، ہر چیز کا پیدا کرنے والا ہے، تو اسی کی بندگی کرو، اور وہ ہر چیز کا نگہبان ہے۔

نگاہیں اس کا احاطہ نہیں کر سکتیں، اور وہ نگاہوں کا احاطہ کر لیتا ہے، اور وہی بڑا باریک بین باخبر ہے۔

تحقیق تمہارے پاس تمہارے رب کی طرف سے بصیرتیں (دلیلیں) آچکی ہیں، تو جس نے دیکھا تو اپنے ہی بھلے کو، اور جو اندھا بنا رہا تو (اس کا وبال) اسی پر ہے، اور میں تم پر کوئی نگہبان نہیں ہوں۔

اور اسی طرح ہم آیتیں پھیر پھیر کر بیان کرتے ہیں تاکہ (کافر) یہ کہیں کہ تم نے (یہ باتیں اہل کتاب سے) پڑھ لی ہیں، اور تاکہ ہم اسے علم رکھنے والوں کے لیے خوب واضح کر دیں۔

پیروی کیجئے اس کی جو آپ کے رب کی طرف سے آپ پر وحی کی گئی، اس کے سوا کوئی معبود نہیں، اور مشرکوں سے منہ موڑ لیں۔

اور اگر اللہ چاہتا تو یہ شرک نہ کرتے، اور ہم نے آپ کو ان پر نگہبان مقرر نہیں کیا، اور نہ ہی آپ ان کے ذمہ دار ہیں۔

اور جن لوگوں کو یہ مشرک اللہ کے سوا پکارتے ہیں انہیں گالی نہ دو کہ یہ بھی کہیں بے ادبی اور جہالت سے اللہ کو گالی نہ دیں، اسی طرح ہم نے ہر امت کے لیے ان کے عمل خوشنما بنا دیے ہیں، پھر انہیں اپنے رب کی طرف لوٹنا ہے تو وہ انہیں بتا دے گا جو کچھ وہ کرتے تھے۔

اور انہوں نے اللہ کی سخت قسمیں کھائیں کہ اگر ان کے پاس کوئی نشانی (معجزہ) آجائے تو وہ اس پر ضرور ایمان لے آئیں گے۔ کہہ دیجئے کہ نشانیاں تو اللہ کے پاس ہیں اور تمہیں کیا خبر کہ جب وہ نشانی آجائے گی تب بھی وہ ایمان نہیں لائیں گے۔

اور ہم ان کے دلوں اور ان کی نگاہوں کو پھیر دیں گے جیسا کہ وہ پہلی مرتبہ اس پر ایمان نہیں لائے تھے، اور ہم انہیں ان کی سرکشی میں بھٹکتے ہوئے چھوڑ دیں گے۔

اور اگر ہم ان کی طرف فرشتے نازل کر دیتے اور ان سے مردے کلام کرتے اور ہم ہر چیز ان کے سامنے لا کر جمع کر دیتے، تب بھی یہ ایمان لانے والے نہ تھے، سوائے اس کے کہ اللہ چاہتا، لیکن ان میں سے اکثر لوگ جہالت برتتے ہیں۔

اور اسی طرح ہم نے ہر نبی کے لیے شیطان انسانوں اور جنوں کو دشمن بنا دیا، وہ دھوکہ دینے کے لیے ایک دوسرے کے دل میں ملمع کی ہوئی (چکنی چپڑی) باتیں ڈالتے رہتے ہیں، اور اگر آپ کا رب چاہتا تو وہ ایسا نہ کرتے، تو آپ انہیں اور ان کے افترا کو چھوڑ دیجئے۔

اور تاکہ اس کی طرف ان لوگوں کے دل مائل ہو جائیں جو آخرت پر ایمان نہیں رکھتے، اور تاکہ وہ اسے پسند کر لیں، اور تاکہ وہ کمائیں جو وہ کمانے والے ہیں (گناہ)۔

(کہہ دیجئے) کیا میں اللہ کے سوا کوئی اور فیصلہ کرنے والا تلاش کروں، حالانکہ وہی ہے جس نے تمہاری طرف مفصل کتاب نازل کی، اور جن لوگوں کو ہم نے کتاب دی وہ جانتے ہیں کہ یہ تمہارے رب کی طرف سے حق کے ساتھ نازل ہوئی ہے، پس تم ہرگز شک کرنے والوں میں سے نہ ہونا۔

اور آپ کے رب کی بات سچائی اور انصاف میں پوری ہے، اس کی باتوں کو کوئی بدلنے والا نہیں، اور وہی ہے سننے والا جاننے والا۔

اور اگر آپ زمین میں بسنے والے اکثر لوگوں کا کہنا مانیں گے تو وہ آپ کو اللہ کے راستے سے بھٹکا دیں گے، وہ تو صرف گمان کے پیچھے چلتے ہیں اور محض اٹکلیں دوڑاتے ہیں۔

بیشک آپ کا رب ہی اسے خوب جانتا ہے جو اس کے راستے سے بھٹکتا ہے اور وہ ہدایت پانے والوں کو بھی خوب جانتا ہے۔

سو (اس جانور میں سے) کھاؤ جس پر (ذبح کے وقت) اللہ کا نام لیا گیا ہو، اگر تم اس کی آیتوں پر ایمان رکھتے ہو۔

اور تمہیں کیا ہے کہ تم وہ چیز نہ کھاؤ جس پر اللہ کا نام لیا گیا ہو حالانکہ اس نے تمہارے لیے وہ تفصیل سے بیان کر دیا ہے جو اس نے تم پر حرام کیا ہے، سوائے اس کے جس کے لیے تم مجبور ہو جاؤ، اور بہت سے لوگ علم کے بغیر اپنی خواہشات سے (دوسروں کو) گمراہ کرتے ہیں، بیشک آپ کا رب حد سے بڑھنے والوں کو خوب جانتا ہے۔

اور ظاہری اور باطنی (چھپے ہوئے) گناہ چھوڑ دو، بیشک جو لوگ گناہ کماتے ہیں عنقریب انہیں اس کی سزا دی جائے گی جو وہ ارتکاب کرتے تھے۔

اور اس میں سے نہ کھاؤ جس پر اللہ کا نام نہ لیا گیا ہو اور یہ گناہ (نافرمانی) ہے، اور بے شک شیاطین اپنے دوستوں کے دلوں میں وسوسے ڈالتے ہیں تاکہ وہ تم سے جھگڑا کریں، اور اگر تم نے ان کا کہنا مانا تو بے شک تم بھی مشرک ہو جاؤ گے۔

بھلا وہ شخص جو مردہ (گمراہ) تھا پھر ہم نے اسے زندہ (ہدایت یافتہ) کر دیا اور ہم نے اسے ایک روشنی دی جس کے ساتھ وہ لوگوں میں چلتا پھرتا ہے، اس شخص کی طرح ہو سکتا ہے جس کی حالت یہ ہے کہ وہ اندھیروں میں ہے اور اس سے نکلنے والا نہیں؟ اسی طرح کافروں کے لیے ان کے اعمال خوشنما بنا دیے گئے ہیں۔

اور اسی طرح ہم نے ہر بستی میں وہاں کے مجرموں کے سردار بنا دیے تاکہ وہ وہاں چالیں چلیں، حالانکہ وہ اپنی چالوں کا وبال اپنی ہی جانوں پر ڈالتے ہیں اور انہیں شعور نہیں۔

اور جب ان کے پاس کوئی آیت آتی ہے تو کہتے ہیں کہ ہم ہرگز ایمان نہیں لائیں گے جب تک کہ ہمیں وہ چیز نہ دی جائے جو اللہ کے رسولوں کو دی گئی ہے۔ اللہ ہی خوب جانتا ہے کہ وہ اپنی رسالت کہاں رکھے (کسے رسول بنائے)۔ عنقریب ان مجرموں کو اللہ کے ہاں ذلت اور سخت عذاب پہنچے گا اس وجہ سے کہ وہ مکر کیا کرتے تھے۔

تو اللہ جسے ہدایت دینے کا ارادہ فرماتا ہے اس کا سینہ اسلام کے لیے کھول دیتا ہے، اور جسے گمراہ کرنے کا ارادہ فرماتا ہے اس کا سینہ تنگ اور بھچا ہوا کر دیتا ہے گویا وہ زبردستی آسمان پر چڑھ رہا ہو، اسی طرح اللہ ان لوگوں پر ناپاکی (اور عذاب) ڈال دیتا ہے جو ایمان نہیں لاتے۔

اور یہی (اسلام) آپ کے رب کا سیدھا راستہ ہے، تحقیق ہم نے آیتیں نصیحت قبول کرنے والوں کے لیے کھول کر بیان کر دی ہیں۔

انہی کے لیے ان کے رب کے ہاں سلامتی کا گھر ہے، اور وہی ان کا دوست ہے ان اعمال کی وجہ سے جو وہ کیا کرتے تھے۔

اور جس دن اللہ ان سب کو جمع کرے گا، (اور فرمائے گا) اے جنوں کی جماعت! تم نے انسانوں میں سے بہت سوں کو (گمراہ) کر لیا۔ اور انسانوں میں سے ان کے دوست کہیں گے: اے ہمارے رب! ہم نے ایک دوسرے سے فائدہ اٹھایا اور ہم اپنی اس معیاد کو پہنچ گئے جو تو نے ہمارے لیے مقرر کی تھی۔ اللہ فرمائے گا: آگ تمہارا ٹھکانہ ہے جس میں تم ہمیشہ رہو گے سوائے اس کے جو اللہ چاہے، بیشک آپ کا رب حکمت والا علم والا ہے۔

اور اسی طرح ہم ظالموں کو ایک دوسرے پر مسلط کرتے ہیں ان اعمال کے سبب جو وہ کماتے تھے۔

اے جنوں اور انسانوں کے گروہ! کیا تمہارے پاس تم ہی میں سے رسول نہیں آئے تھے جو تم پر میری آیتیں بیان کرتے تھے اور تمہیں آج کے دن کی پیشی سے ڈراتے تھے؟ وہ کہیں گے: ہم نے اپنے خلاف گواہی دی، اور انہیں دنیا کی زندگی نے دھوکے میں ڈال دیا اور وہ اپنی جانوں کے خلاف گواہی دیں گے کہ بیشک وہ کافر تھے۔

یہ (رسولوں کا بھیجنا) اس لیے تھا کہ آپ کا رب بستیوں کو ظلم سے ہلاک نہیں کرتا اس حال میں کہ اس کے رہنے والے بے خبر ہوں۔

اور ہر ایک کے لیے ان کے اعمال کے لحاظ سے درجے ہیں، اور آپ کا رب اس سے بے خبر نہیں جو وہ کرتے ہیں۔

اور آپ کا رب بے نیاز رحمت والا ہے، اگر وہ چاہے تو تمہیں لے جائے (ختم کر دے) اور تمہارے بعد جسے چاہے تمہارا جانشین بنا دے جیسا کہ اس نے تمہیں دوسرے لوگوں کی نسل سے پیدا کیا ہے۔

بیشک جس چیز کا تم سے وعدہ کیا جاتا ہے وہ ضرور آنے والی ہے اور تم (خدا کو) عاجز نہیں کر سکتے۔

آپ فرما دیجئے: اے میری قوم! تم اپنی جگہ عمل کیے جاؤ، میں (اپنی جگہ) عمل کر رہا ہوں، سو تم عنقریب جان لو گے کہ (آخرت کا) اچھا انجام کس کے لیے ہوتا ہے، بیشک ظالم لوگ فلاح نہیں پائیں گے۔

اور انہوں نے اللہ کے لیے اسی کی پیدا کردہ کھیتی اور مویشیوں میں سے ایک حصہ مقرر کیا ہے اور اپنے خیال میں کہتے ہیں کہ یہ اللہ کے لیے ہے اور یہ ہمارے شریکوں (بتوں) کے لیے ہے، پھر جو ان کے شریکوں کا ہوتا ہے وہ تو اللہ تک نہیں پہنچتا اور جو اللہ کا ہوتا ہے وہ ان کے شریکوں تک پہنچ جاتا ہے، یہ کتنا برا فیصلہ کرتے ہیں۔

اور اسی طرح بہت سے مشرکوں کے لیے ان کے شریکوں نے ان کی اولاد کو قتل کرنا خوشنما بنا دیا ہے تاکہ وہ انہیں ہلاک کر دیں اور ان پر ان کا دین مشتبہ کر دیں، اور اگر اللہ چاہتا تو وہ ایسا نہ کرتے، سو آپ انہیں چھوڑ دیجئے اور اسے (بھی) جو وہ بہتان باندھتے ہیں۔

اور انہوں نے کہا کہ یہ مویشی اور کھیتی منع ہے، اسے کوئی نہیں کھا سکتا سوائے اس کے جسے ہم چاہیں (یہ) ان کے گمان کے مطابق (ہے)، اور کچھ مویشی ہیں جن کی پیٹھیں حرام کی گئی ہیں اور کچھ مویشی ہیں جن پر وہ (ذبح کے وقت) اللہ کا نام نہیں لیتے، یہ سب اس (اللہ) پر بہتان ہے، عنقریب وہ انہیں سزا دے گا اس کی جو وہ بہتان باندھتے تھے۔

اور انہوں نے کہا کہ جو ان مویشیوں کے پیٹ میں ہے وہ خاص ہمارے مردوں کے لیے ہے اور ہماری عورتوں پر حرام ہے، اور اگر وہ مردہ ہو تو وہ سب اس میں شریک ہیں، عنقریب وہ (اللہ) انہیں ان کے (غلط) بیان کی سزا دے گا، بیشک وہ حکمت والا علم والا ہے۔

بیشک وہ لوگ خسارے میں پڑ گئے جنہوں نے اپنی اولاد کو جہالت اور نادانی سے قتل کیا اور اس رزق کو حرام کر لیا جو اللہ نے انہیں دیا تھا، اللہ پر بہتان باندھتے ہوئے، بیشک وہ گمراہ ہو گئے اور وہ ہدایت پانے والے نہ تھے۔

اور وہی ہے جس نے باغات پیدا کیے، چھتریوں والے (ٹٹیوں پر چڑھائے ہوئے) اور بغیر چھتریوں والے، اور کھجور کے درخت اور کھیتی جن کے ذائقے مختلف ہیں اور زیتون اور انار جو ایک دوسرے سے ملتے جلتے ہیں اور جدا جدا بھی۔ اس کے پھل میں سے کھاؤ جب وہ پھل لائے اور اس کی کٹائی کے دن اس کا حق (عشر) ادا کرو اور اسراف نہ کرو، بیشک وہ اسراف کرنے والوں کو پسند نہیں کرتا۔

اور مویشیوں میں سے کچھ بوجھ اٹھانے والے ہیں اور کچھ زمین سے لگے ہوئے (چھوٹے قد کے)، اس میں سے کھاؤ جو اللہ نے تمہیں رزق دیا ہے اور شیطان کے قدموں کی پیروی نہ کرو، بیشک وہ تمہارا کھلا دشمن ہے۔

آٹھ (قسم کے) جوڑے ہیں، بھیڑ میں سے دو اور بکری میں سے دو، کہہ دیجئے: کیا اس نے دونوں نر حرام کیے ہیں یا دونوں مادہ یا وہ (بچہ) جسے دونوں مادہ کے رحم پیٹ میں لیے ہوئے ہیں؟ مجھے علم کے ساتھ بتاؤ اگر تم سچے ہو۔

اور اونٹ میں سے دو اور گائے میں سے دو، کہہ دیجئے: کیا اس نے دونوں نر حرام کیے ہیں یا دونوں مادہ یا وہ جسے دونوں مادہ کے رحم پیٹ میں لیے ہوئے ہیں؟ یا تم موجود تھے جب اللہ نے تمہیں اس کا حکم دیا تھا؟ پھر اس سے بڑھ کر ظالم کون ہے جو اللہ پر جھوٹ باندھے تاکہ لوگوں کو جہالت کی بنا پر گمراہ کرے، بیشک اللہ ظالم قوم کو ہدایت نہیں دیتا۔

کہہ دیجئے: میں نہیں پاتا اس میں جو میری طرف وحی کی گئی ہے کوئی چیز حرام کسی کھانے والے پر جو اسے کھائے سوائے اس کے کہ وہ مردہ ہو یا بہتا ہوا خون یا سور کا گوشت، کیونکہ وہ ناپاک ہے یا نافرمانی کا جانور جس پر (ذبح کے وقت) اللہ کے سوا کسی اور کا نام پکارا گیا ہو، پھر جو مجبور ہو جائے نہ تو خواہشمند ہو اور نہ حد سے بڑھنے والا تو بیشک آپ کا رب بخشنے والا مہربان ہے۔

اور ہم نے یہودیوں پر ہر ناخن والا جانور حرام کر دیا تھا، اور گائے اور بکری میں سے ہم نے ان پر دونوں کی چربیاں حرام کر دی تھیں سوائے اس کے جو ان کی پیٹھوں یا انتڑیوں پر لگی ہو یا جو ہڈی سے ملی ہوئی ہو، یہ ہم نے انہیں ان کی سرکشی کی سزا دی تھی، اور بیشک ہم سچے ہیں۔

پھر اگر وہ آپ کو جھٹلائیں تو کہہ دیجئے: تمہارا رب وسیع رحمت والا ہے، اور اس کا عذاب مجرم قوم سے نہیں ٹالا جاتا۔

عنقریب شرک کرنے والے کہیں گے: اگر اللہ چاہتا تو نہ ہم شرک کرتے اور نہ ہمارے باپ دادا اور نہ ہم کوئی چیز حرام کرتے، اسی طرح ان لوگوں نے بھی جھٹلایا تھا جو ان سے پہلے تھے یہاں تک کہ انہوں نے ہمارے عذاب کا مزہ چکھ لیا۔ کہہ دیجئے: کیا تمہارے پاس کوئی علم ہے جسے تم ہمارے لیے ظاہر کرو؟ تم تو صرف گمان کی پیروی کرتے ہو اور تم صرف اٹکلیں دوڑاتے ہو۔

کہہ دیجئے: پس اللہ ہی کے لیے پوری حجت (دلیل) ہے، سو اگر وہ چاہتا تو تم سب کو ہدایت دے دیتا۔

کہہ دیجئے: اپنے وہ گواہ لاؤ جو گواہی دیں کہ اللہ نے اسے حرام کیا ہے، پھر اگر وہ گواہی دے دیں تو آپ ان کے ساتھ گواہی نہ دیجئے گا، اور ان لوگوں کی خواہشات کی پیروی نہ کریں جنہوں نے ہماری آیتوں کو جھٹلایا اور جو آخرت پر ایمان نہیں لاتے اور وہ (جھوٹے معبودوں کو) اپنے رب کے برابر ٹھہراتے ہیں۔