بیشک اللہ ہی میرا اور تمہارا رب ہے سو اُسی کی عبادت کرو، یہی سیدھا راستہ ہے۔

پھر جب عیسیٰ (علیہ السلام) نے ان سے کفر محسوس کیا تو کہنے لگے: اللہ کی طرف (بلانے میں) کون میرا مددگار ہے؟ حواریوں نے کہا: ہم اللہ (کے دین) کے مددگار ہیں، ہم اللہ پر ایمان لائے، اور آپ گواہ رہیں کہ ہم مسلمان ہیں۔

اے ہمارے رب! ہم اس پر ایمان لائے جو تو نے نازل فرمایا اور ہم نے رسول کی پیروی کی، پس تو ہمیں گواہی دینے والوں کے ساتھ لکھ لے۔

اور انہوں (کافروں) نے خفیہ تدبیر کی اور اللہ نے (خفیہ) تدبیر کی، اور اللہ سب سے بہتر تدبیر کرنے والا ہے۔

جب اللہ نے فرمایا: اے عیسیٰ! بے شک میں تجھے پوری طرح لینے والا ہوں اور تجھے اپنی طرف اٹھانے والا ہوں اور تجھے کافروں سے پاک کرنے والا ہوں اور تیرے پیروکاروں کو قیامت تک کافروں پر غلبہ دینے والا ہوں، پھر میری ہی طرف تمہارا لوٹنا ہے تو میں تمہارے درمیان اس بات کا فیصلہ کروں گا جس میں تم جھگڑتے تھے۔

پس وہ لوگ جنہوں نے کفر کیا تو میں انہیں دنیا اور آخرت میں سخت عذاب دوں گا اور ان کا کوئی مددگار نہ ہوگا۔

اور جو لوگ ایمان لائے اور انہوں نے نیک عمل کیے تو وہ (اللہ) انہیں ان کے اجر پورے دے گا، اور اللہ ظالموں کو پسند نہیں کرتا۔

یہ جو ہم آپ کو پڑھ کر سناتے ہیں، آیتیں ہیں اور حکمت والی نصیحت ہے۔

بیشک اللہ کے نزدیک عیسیٰ کی مثال آدم کی سی ہے، اسے مٹی سے پیدا کیا پھر اسے فرمایا "ہو جا" تو وہ ہو جاتا ہے۔

حق تیرے رب کی طرف سے ہے پس شک کرنے والوں میں سے نہ ہو جا۔

پھر جو کوئی آپ سے اس (عیسیٰ) کے بارے میں جھگڑا کرے اس کے بعد کہ آپ کے پاس علم آ چکا ہے تو کہہ دیجئے آؤ ہم اپنے بیٹوں کو اور تمہارے بیٹوں کو اور اپنی عورتوں کو اور تمہاری عورتوں کو اور اپنی جانوں کو اور تمہاری جانوں کو بلا لیں، پھر ہم گڑگڑا کر دعا کریں اور جھوٹوں پر اللہ کی لعنت بھیجیں۔

بیشک یہ سچا بیان ہے، اور اللہ کے سوا کوئی معبود نہیں، اور بیشک اللہ ہی غالب حکمت والا ہے۔

پھر اگر وہ منہ پھیر لیں تو بیشک اللہ فساد کرنے والوں کو خوب جانتا ہے۔

کہہ دیجئے اے اہل کتاب! اس بات کی طرف آؤ جو ہمارے اور تمہارے درمیان برابر ہے کہ ہم اللہ کے سوا کسی کی عبادت نہ کریں اور اس کے ساتھ کسی چیز کو شریک نہ ٹھہرائیں اور ہم میں سے کوئی اللہ کے سوا کسی کو رب نہ بنائے، پھر اگر وہ منہ پھیر لیں تو کہہ دو کہ گواہ رہو ہم تو مسلمان ہیں۔

اے اہل کتاب! تم ابراہیم کے بارے میں کیوں جھگڑتے ہو؟ حالانکہ تورات اور انجیل تو ان کے بعد نازل کی گئی ہیں، کیا تم عقل نہیں رکھتے؟

سنو! تم وہ لوگ ہو جو اس بات میں جھگڑ چکے جس کا تمہیں علم تھا تو اب اس بات میں کیوں جھگڑتے ہو جس کا تمہیں کچھ علم نہیں؟ اور اللہ جانتا ہے اور تم نہیں جانتے۔

ابراہیم (علیہ السلام) نہ یہودی تھے اور نہ عیسائی بلکہ وہ تو ایک (اللہ کی) طرف ہونے والے مسلمان تھے، اور وہ مشرکوں میں سے نہ تھے۔

بیشک لوگوں میں ابراہیم کے سب سے زیادہ قریب وہ لوگ ہیں جنہوں نے ان کی پیروی کی اور یہ نبی اور وہ لوگ جو ایمان لائے، اور اللہ مومنوں کا ولی ہے۔

اہل کتاب میں سے ایک گروہ چاہتا ہے کہ کاش وہ تمہیں گمراہ کر دیں، حالانکہ وہ اپنے آپ کو ہی گمراہ کر رہے ہیں اور وہ شعور نہیں رکھتے۔

اے اہل کتاب! تم اللہ کی آیتوں کا انکار کیوں کرتے ہو حالانکہ تم خود گواہ ہو؟

اے اہل کتاب! تم حق کو باطل کے ساتھ کیوں خلط ملط کرتے ہو اور حق کو چھپاتے ہو حالانکہ تم جانتے ہو؟

اور اہل کتاب کی ایک جماعت نے کہا کہ اس (قرآن) پر جو ایمان لانے والوں پر نازل کیا گیا ہے، دن کے شروع میں ایمان لے آؤ اور اس کے آخر میں انکار کر دو تاکہ شاید وہ (مسلمان اپنے دین سے) پھر جائیں۔

اور یقین نہ کرو مگر اس کا جو تمہارے دین کی پیروی کرے، کہہ دیجئے کہ بیشک ہدایت تو اللہ کی ہدایت ہے، (کیا تم اس بات پر جلتے ہو) کہ کسی کو وہ کچھ دے دیا جائے جیسا تمہیں دیا گیا یا وہ تمہارے رب کے ہاں تم سے حجت کریں؟ کہہ دیجئے کہ بیشک فضل اللہ کے ہاتھ میں ہے، وہ جسے چاہتا ہے دیتا ہے، اور اللہ وسعت والا، جاننے والا ہے۔

وہ جسے چاہتا ہے اپنی رحمت کے لیے خاص کر لیتا ہے، اور اللہ بڑے فضل والا ہے۔

اور اہل کتاب میں کوئی ایسا ہے کہ اگر تم اس پر ڈھیر سارے مال کا اعتبار کرو تو وہ تمہیں لوٹا دے گا، اور ان میں کوئی ایسا ہے کہ اگر تم ایک دینار کا بھی اعتبار کرو تو وہ تمہیں نہیں لوٹائے گا مگر جب تک تم اس کے سر پر کھڑے رہو، یہ اس لیے کہ انہوں نے کہا کہ امیوں (غیر یہودیوں) کے بارے میں ہم پر کوئی گناہ نہیں، اور وہ اللہ پر جان بوجھ کر جھوٹ بولتے ہیں۔

ہاں (کیوں نہیں)، جو اپنا عہد پورا کرے اور پرہیزگاری کرے تو بیشک اللہ پرہیزگاروں کو پسند کرتا ہے۔

بیشک جو لوگ اللہ کے عہد اور اپنی قسموں کے بدلے تھوڑی قیمت خریدتے ہیں، یہی وہ لوگ ہیں جن کے لیے آخرت میں کوئی حصہ نہیں، اور اللہ نہ ان سے کلام کرے گا اور نہ قیامت کے دن ان کی طرف دیکھے گا، اور نہ انہیں پاک کرے گا، اور ان کے لیے دردناک عذاب ہے۔

اور بیشک ان میں ایک گروہ ایسا ہے جو کتاب پڑھتے ہوئے اپنی زبانوں کو موڑ لیتے ہیں تاکہ تم اسے کتاب کا حصہ سمجھو حالانکہ وہ کتاب کا حصہ نہیں، اور وہ کہتے ہیں یہ اللہ کی طرف سے ہے حالانکہ وہ اللہ کی طرف سے نہیں، اور وہ اللہ پر جھوٹ بولتے ہیں اور وہ جانتے ہیں۔

کسی انسان کے لیے لائق نہیں کہ اللہ اسے کتاب اور حکمت اور نبوت عطا فرمائے پھر وہ لوگوں سے کہے کہ اللہ کو چھوڑ کر میرے بندے بن جاؤ، بلکہ (وہ تو یہی کہے گا کہ) اللہ والے بن جاؤ اس سبب سے کہ تم کتاب سکھاتے ہو اور اس وجہ سے کہ تم پڑھتے ہو۔

اور نہ وہ تمہیں یہ حکم دے گا کہ تم فرشتوں اور نبیوں کو رب بنا لو، کیا وہ تمہیں کفر کا حکم دے گا بعد اس کے کہ تم مسلمان ہو؟

اور یاد کرو جب اللہ نے نبیوں سے عہد لیا کہ جب میں تمہیں کتاب اور حکمت عطا کر دوں، پھر تمہارے پاس کوئی رسول آئے جو اس (کتاب) کی تصدیق کرنے والا ہو جو تمہارے پاس ہے، تو تم اس پر ضرور ایمان لانا اور ضرور اس کی مدد کرنا۔ فرمایا: کیا تم نے اقرار کیا اور اس پر میرا بھاری ذمہ لیا؟ انہوں نے کہا: ہم نے اقرار کیا۔ فرمایا: پس تم گواہ رہو اور میں بھی تمہارے ساتھ گواہوں میں سے ہوں۔

پھر جو کوئی اس کے بعد پھر گیا تو وہی لوگ نافرمان ہیں۔

تو کیا یہ اللہ کے دین کے سوا (کچھ اور) چاہتے ہیں حالانکہ جو کوئی آسمانوں اور زمین میں ہے اسی کے تابع ہے، خوشی سے اور مجبوری سے، اور اسی کی طرف وہ لوٹائے جائیں گے۔

کہہ دیجئے ہم اللہ پر ایمان لائے اور اس پر جو ہماری طرف نازل کیا گیا اور جو ابراہیم اور اسماعیل اور اسحاق اور یعقوب اور ان کی اولاد کی طرف نازل کیا گیا، اور جو موسیٰ اور عیسیٰ اور دیگر نبیوں کو ان کے رب کی طرف سے دیا گیا، ہم ان میں سے کسی کے درمیان فرق نہیں کرتے اور ہم اسی کے فرمانبردار ہیں۔

اور جو کوئی اسلام کے سوا کسی اور دین کو چاہے گا تو وہ اس سے ہرگز قبول نہیں کیا جائے گا، اور وہ آخرت میں نقصان اٹھانے والوں میں سے ہوگا۔

اللہ ایسی قوم کو کیونکر ہدایت دے گا جنہوں نے اپنے ایمان لانے کے بعد کفر کیا اور وہ گواہی دے چکے تھے کہ یہ رسول سچا ہے اور ان کے پاس روشن نشانیاں آچکی تھیں؟ اور اللہ ظالم قوم کو ہدایت نہیں دیتا۔

یہی وہ لوگ ہیں جن کی سزا یہ ہے کہ ان پر اللہ کی اور فرشتوں کی اور سب لوگوں کی لعنت ہے۔

وہ اس (لعنت) میں ہمیشہ رہیں گے، نہ ان سے عذاب ہلکا کیا جائے گا اور نہ انہیں مہلت دی جائے گی۔

مگر وہ لوگ جنہوں نے اس کے بعد توبہ کر لی اور اپنی اصلاح کر لی تو بیشک اللہ بخشنے والا مہربان ہے۔

بیشک جو لوگ اپنے ایمان لانے کے بعد کافر ہو گئے پھر کفر میں بڑھتے چلے گئے تو ان کی توبہ ہرگز قبول نہ ہوگی، اور یہی لوگ گمراہ ہیں۔

بیشک جو لوگ کافر ہوئے اور وہ مر گئے اس حال میں کہ وہ کافر ہی تھے تو ان میں سے کسی سے زمین بھر سونا بھی ہرگز قبول نہیں کیا جائے گا اگرچہ وہ اسے فدیہ میں دے، یہی وہ لوگ ہیں جن کے لیے دردناک عذاب ہے اور ان کا کوئی مددگار نہ ہوگا۔

تم ہرگز نیکی کو نہیں پاؤ گے جب تک تم اس میں سے خرچ نہ کرو جس سے تم محبت کرتے ہو، اور تم جو چیز بھی خرچ کرو گے تو بیشک اللہ اسے خوب جاننے والا ہے۔

تمام کھانے بنی اسرائیل کے لیے حلال تھے سوائے اس کے جو اسرائیل (یعقوب) نے اپنے اوپر حرام کر لیا تھا اس سے پہلے کہ تورات نازل کی جاتی۔ کہہ دیجئے: پس تورات لاؤ پھر اسے پڑھو اگر تم سچے ہو۔

پھر جس نے اس کے بعد اللہ پر جھوٹ باندھا تو وہی لوگ ظالم ہیں۔

کہہ دیجئے: اللہ نے سچ فرمایا، سو تم ابراہیم کے دین کی پیروی کرو جو یکسو تھے، اور وہ مشرکوں میں سے نہ تھے۔

بیشک سب سے پہلا گھر جو لوگوں (کی عبادت) کے لیے مقرر کیا گیا وہ ہے جو مکہ میں ہے، برکت والا ہے اور تمام جہانوں کے لیے ہدایت ہے۔

اس میں کھلی نشانیاں ہیں (جیسے) مقام ابراہیم، اور جو اس میں داخل ہوا وہ امان پا گیا، اور اللہ کے لیے لوگوں پر اس گھر کا حج فرض ہے جو وہاں تک پہنچنے کی طاقت رکھتا ہو، اور جو کفر کرے تو بیشک اللہ تمام جہانوں سے بے نیاز ہے۔

کہہ دیجئے اے اہل کتاب! تم اللہ کی آیتوں کا انکار کیوں کرتے ہو؟ حالانکہ اللہ اس پر گواہ ہے جو تم کرتے ہو۔

کہہ دیجئے اے اہل کتاب! تم اللہ کے راستے سے اسے کیوں روکتے ہو جو ایمان لایا؟ تم اس میں کجی تلاش کرتے ہو حالانکہ تم گواہ ہو، اور اللہ اس سے بے خبر نہیں جو تم کرتے ہو۔

اے ایمان والو! اگر تم اہل کتاب میں سے کسی گروہ کا کہا مانو گے تو وہ تمہیں تمہارے ایمان لانے کے بعد کافر بنا دیں گے۔