جنہوں نے اپنے دین کو کھیل اور تماشا بنا رکھا تھا اور دنیا کی زندگی نے انہیں دھوکے میں ڈال دیا تھا، سو آج ہم بھی انہیں بھلا دیں گے جیسا کہ وہ اپنے اس دن کی ملاقات کو بھولے رہے اور جیسا کہ وہ ہماری آیتوں کا انکار کرتے تھے۔

اور ہم نے ان کے پاس ایسی کتاب پہنچا دی ہے جس کو ہم نے اپنے علم کامل سے بہت واضح کر کے بیان کر دیا ہے، وہ مومنوں کے لیے ہدایت اور رحمت ہے۔

کیا یہ لوگ اس کے سوا منتظر ہیں کہ اس کی حقیقت ظاہر ہو؟ جس دن اس کی حقیقت ظاہر ہو گی تو جو لوگ اس کو پہلے سے بھولے ہوئے تھے، کہیں گے کہ بےشک ہمارے پروردگار کے پیغمبر حق لے کر آئے تھے، تو کیا ہمارا بھی کوئی سفارشی ہے کہ ہماری سفارش کرے یا ہم پھر (دنیا میں) لوٹا دیئے جائیں تاکہ جو عمل ہم (پہلے) کرتے تھے ان کے سوا اور طرح کے عمل کریں۔ بےشک ان لوگوں نے اپنا نقصان کیا اور جو کچھ یہ افترا کرتے تھے وہ سب ان سے جاتا رہا۔

بےشک تمہارا پروردگار خدا ہی ہے جس نے آسمانوں اور زمین کو چھ دن میں پیدا کیا پھر عرش پر جا ٹھہرا۔ وہی رات کو دن کا لباس پہناتا ہے کہ وہ اس کے پیچھے دوڑتا چلا آتا ہے اور اسی نے سورج اور چاند اور ستاروں کو پیدا کیا سب اس کے حکم کے تابع ہیں۔ دیکھو سب مخلوق بھی اسی کی ہے اور حکم بھی اسی کا ہے۔ یہ خدا رب العالمین بڑی برکت والا ہے۔

تم لوگ اپنے پروردگار سے عاجزی سے اور چپکے چپکے دعائیں مانگا کرو۔ وہ حد سے بڑھنے والوں کو دوست نہیں رکھتا۔

اور ملک میں اصلاح کے بعد خرابی نہ کرنا اور خدا سے خوف اور امید سے دعا مانگتے رہنا۔ کچھ شک نہیں کہ خدا کی رحمت نیکی کرنے والوں سے قریب ہے۔

اور وہی تو ہے جو اپنی رحمت (یعنی بارش) سے پہلے ہواؤں کو خوشخبری بنا کر بھیجتا ہے۔ یہاں تک کہ جب وہ بھاری بھاری بادلوں کو اٹھا لاتی ہے تو ہم اس کو ایک مری ہوئی بستی کی طرف ہانک دیتے ہیں۔ پھر اس سے پانی برساتے ہیں۔ پھر پانی سے ہر طرح کے پھل نکالتے ہیں۔ اسی طرح ہم مردوں کو بھی (زمین سے) نکال کھڑا کریں گے (یہ باتیں اس لیے سنائی جاتی ہیں) تاکہ تم نصیحت پکڑو۔

اور جو اچھی زمین ہوتی ہے اس کی پیداوار تو خدا کے حکم سے خوب نکلتی ہے۔ اور جو خراب ہوتی ہے اس کی پیداوار بہت کم نکلتی ہے۔ اسی طرح ہم شکرگزار لوگوں کے لیے اپنی آیتیں پھیر پھیر کر بیان کرتے ہیں۔

ہم نے نوح کو ان کی قوم کی طرف بھیجا تو انہوں نے کہا کہ بھائیو، خدا ہی کی عبادت کرو، اس کے سوا تمہارا کوئی معبود نہیں۔ مجھے تمہارے بارے میں بڑے دن کے عذاب کا ڈر ہے۔

ان کی قوم کے سرداروں نے کہا کہ ہم تمہیں صریح گمراہی میں دیکھتے ہیں۔

انہوں نے کہا کہ بھائیو، مجھ میں کسی طرح کی گمراہی نہیں ہے بلکہ میں پروردگار عالم کا پیغمبر ہوں۔

تمہیں اپنے پروردگار کے پیغام پہنچاتا ہوں اور تمہاری خیر خواہی کرتا ہوں اور خدا کی طرف سے وہ باتیں جانتا ہوں جو تم نہیں جانتے۔

کیا تم کو اس بات سے تعجب ہوا ہے کہ تم میں سے ایک شخص کے ہاتھ تمہارے پروردگار کی طرف سے تمہارے پاس نصیحت آئی تاکہ وہ تمہیں ڈرائے اور تاکہ تم پرہیزگار بنو اور تاکہ تم پر رحم کیا جائے۔

مگر ان لوگوں نے ان کو جھٹلایا تو ہم نے نوح کو اور جو ان کے ساتھ کشتی میں سوار تھے ان کو بچا لیا اور جنہوں نے ہماری آیتوں کو جھٹلایا تھا انہیں غرق کر دیا۔ کچھ شک نہیں کہ وہ اندھے لوگ تھے۔

اور (قوم) عاد کی طرف ان کے بھائی ہود کو بھیجا۔ انہوں نے کہا کہ بھائیو خدا ہی کی عبادت کرو اس کے سوا تمہارا کوئی معبود نہیں۔ کیا تم ڈرتے نہیں؟

ان کی قوم کے سردار جو کافر تھے کہنے لگے کہ ہم تمہیں بیوقوفی میں مبتلا دیکھتے ہیں اور جھوٹا خیال کرتے ہیں۔

انہوں نے کہا کہ بھائیو مجھ میں بیوقوفی کی کوئی بات نہیں بلکہ میں پروردگار عالم کا پیغمبر ہوں۔

تم کو اپنے پروردگار کے پیغام پہنچاتا ہوں اور تمہارا امانت دار خیرخواہ ہوں۔

کیا تم کو اس بات سے تعجب ہوا ہے کہ تم میں سے ایک شخص کے ہاتھ تمہارے پروردگار کی طرف سے تمہارے پاس نصیحت آئی تاکہ وہ تمہیں ڈرائے اور یاد تو کرو جب اس نے تم کو قوم نوح کے بعد سردار بنایا اور تم کو پھیلاؤ زیادہ دیا تو خدا کی نعمتوں کو یاد کرو تاکہ فلاح پاؤ۔

وہ کہنے لگے کہ کیا تم ہمارے پاس اس لیے آئے ہو کہ ہم اکیلے خدا ہی کی عبادت کریں اور جن کو ہمارے باپ دادا پوجتے چلے آئے ہیں ان کو چھوڑ دیں؟ پس اگر سچے ہو تو جس چیز سے ہمیں ڈراتے ہو اسے لے آؤ۔

انہوں نے کہا کہ تمہارے پروردگار کی طرف سے تم پر عذاب اور غضب کا نازل ہونا یقینی ہوگیا ہے۔ کیا تم مجھ سے ایسے ناموں کے بارے میں جھگڑتے ہو جو تم نے اور تمہارے باپ دادا نے رکھ لیے ہیں۔ جن کی خدا نے کوئی سند نازل نہیں کی۔ تو تم بھی انتظار کرو میں بھی تمہارے ساتھ انتظار کرتا ہوں۔

تو ہم نے ہود کو اور جو لوگ ان کے ساتھ تھے ان کو اپنی رحمت سے بچا لیا اور جنہوں نے ہماری آیتوں کو جھٹلایا تھا ان کی جڑ کاٹ دی اور وہ ایمان لانے والے ہی نہ تھے۔

اور (قوم) ثمود کی طرف ان کے بھائی صالح کو بھیجا۔ انہوں نے کہا کہ بھائیو، خدا ہی کی عبادت کرو، اس کے سوا تمہارا کوئی معبود نہیں۔ تمہارے پاس تمہارے پروردگار کی طرف سے ایک روشن دلیل آچکی ہے۔ یہ خدا کی اونٹنی تمہارے لیے ایک نشانی ہے تو اسے چھوڑ دو کہ خدا کی زمین میں چرتی پھرے اور اسے کوئی تکلیف نہ دینا، نہیں تو تمہیں درد دینے والا عذاب آ پکڑے گا۔

اور یاد کرو جب اس نے تم کو (قوم) عاد کے بعد سردار بنایا اور زمین پر آباد کیا کہ نرم زمین سے محل بناتے ہو اور پہاڑوں کو تراش کر گھر بناتے ہو۔ پس خدا کی نعمتوں کو یاد کرو اور زمین میں فساد نہ کرتے پھرو۔

تو ان کی قوم کے سردار جو تکبر کرتے تھے، ان غریبوں سے جو ان میں سے ایمان لے آئے تھے، کہنے لگے، بھلا تم یقین کرتے ہو کہ صالح اپنے پروردگار کی طرف سے بھیجے گئے ہیں؟ انہوں نے کہا، بےشک جو چیز دے کر وہ بھیجے گئے ہیں ہم اس پر ایمان رکھتے ہیں۔

تو جو لوگ متکبر تھے وہ کہنے لگے کہ جس چیز پر تم ایمان لائے ہو ہم اس کو نہیں مانتے۔

آخر انہوں نے اونٹنی کو مار ڈالا اور اپنے پروردگار کے حکم سے سرکشی کی اور کہنے لگے کہ صالح! جس چیز سے تم ہمیں ڈراتے تھے، اگر تم پیغمبر ہو تو اسے لے آؤ۔

تو ان کو بھونچال نے آ پکڑا اور وہ اپنے گھروں میں اوندھے پڑے رہ گئے۔

تب صالح ان سے منہ پھیر کر چلے گئے اور کہنے لگے کہ بھائیو میں نے تم کو اپنے پروردگار کا پیغام پہنچا دیا تھا اور تمہاری خیر خواہی کی تھی لیکن تم خیر خواہوں کو دوست ہی نہیں رکھتے۔

اور لوط کو (یاد کرو) جب انہوں نے اپنی قوم سے کہا کہ تم ایسی بےحیائی کا کام کیوں کرتے ہو جو تم سے پہلے اہل عالم میں سے کسی نے نہیں کیا۔

تم عورتوں کو چھوڑ کر مردوں کے ساتھ شہوت رانی کرتے ہو۔ حقیقت یہ ہے کہ تم لوگ حد سے نکل جانے والے ہو۔

تو ان کی قوم کے لوگ جواب میں اس کے سوا کچھ نہ کہہ سکے کہ ان لوگوں کو اپنے شہر سے نکال دو۔ یہ بڑے پاکباز بنتے ہیں۔

تو ہم نے لوط اور ان کے گھر والوں کو بچا لیا بجز ان کی بیوی کے کہ وہ پیچھے رہ جانے والوں میں تھی۔

اور ہم نے ان پر (پتھروں کا) مینہ برسایا۔ تو دیکھو کہ گنہگاروں کا کیسا انجام ہوا۔

اور مدین کی طرف ان کے بھائی شعیب کو بھیجا۔ انہوں نے کہا کہ بھائیو، خدا ہی کی عبادت کرو، اس کے سوا تمہارا کوئی معبود نہیں۔ تمہارے پاس تمہارے پروردگار کی طرف سے دلیل روشن آچکی ہے۔ تو ناپ اور تول پوری کیا کرو اور لوگوں کو ان کی چیزیں کم نہ دیا کرو۔ اور ملک میں اصلاح کے بعد خرابی نہ کرو۔ اگر تم صاحب ایمان ہو تو یہ بات تمہارے حق میں بہتر ہے۔

اور ہر راستے پر مت بیٹھا کرو کہ جو شخص خدا پر ایمان لاتا ہے اسے تم ڈراتے اور خدا کے راستے سے روکتے ہو اور اس میں کجی تلاش کرتے ہو۔ اور اس وقت کو یاد کرو جب تم تھوڑے تھے تو خدا نے تم کو جماعت کثیر بنا دیا اور دیکھ لو کہ خرابی کرنے والوں کا انجام کیسا ہوا۔

اور اگر تم میں سے ایک جماعت اس چیز پر ایمان لے آئی ہے جو میرے ذریعے بھیجی گئی ہے اور ایک جماعت ایمان نہیں لائی تو صبر کرو یہاں تک کہ خدا ہمارے درمیان فیصلہ کر دے۔ اور وہ سب سے بہتر فیصلہ کرنے والا ہے۔

ان کی قوم کے متکبر سرداروں نے کہا کہ شعیب! ہم تم کو اور جو لوگ تمہارے ساتھ ایمان لائے ہیں ان کو اپنے شہر سے نکال دیں گے یا تم ہمارے مذہب میں آجاؤ۔ انہوں نے کہا خواہ ہم ناخوش ہی ہوں؟

اگر ہم بعد اس کے کہ خدا ہمیں اس سے نجات بخش چکا ہے تمہارے مذہب میں لوٹ جائیں تو بےشک ہم نے خدا پر جھوٹ افترا کیا۔ اور ہمارے لیے ممکن نہیں کہ ہم اس میں لوٹ جائیں ہاں خدا جو ہمارا پروردگار ہے وہ چاہے تو (اور بات ہے)۔ ہمارے پروردگار کا علم ہر چیز پر محیط ہے۔ ہمارا خدا ہی پر بھروسہ ہے۔ اے پروردگار ہم میں اور ہماری قوم میں انصاف کے ساتھ فیصلہ کردے اور تو سب سے بہتر فیصلہ کرنے والا ہے۔

اور ان کی قوم کے کافر سرداروں نے کہا کہ اگر تم نے شعیب کی پیروی کی تو بےشک تم خسارے میں پڑگئے۔

تو ان کو بھونچال نے آپکڑا اور وہ اپنے گھروں میں اوندھے پڑے رہ گئے۔

جن لوگوں نے شعیب کو جھٹلایا تھا (ان کا یہ حال ہوا کہ) گویا وہ ان گھروں میں کبھی بسے ہی نہ تھے۔ جنہوں نے شعیب کو جھٹلایا وہی نقصان اٹھانے والے ہوئے۔

تب وہ ان سے منہ پھیر کر چلے گئے اور کہا کہ بھائیو میں نے تم کو اپنے پروردگار کے پیغام پہنچا دیئے تھے اور تمہاری خیر خواہی کی تھی پس میں کافروں پر افسوس کیوں کروں؟

اور ہم نے کسی بستی میں کوئی پیغمبر نہیں بھیجا مگر وہاں کے رہنے والوں کو سختی اور تکلیف میں پکڑ لیا تاکہ وہ عاجزی کریں۔

پھر ہم نے تکلیف کو آسودگی سے بدل دیا یہاں تک کہ وہ خوب پھولے پھلے اور کہنے لگے کہ تکلیف اور راحت ہمارے باپ دادا کو بھی پہنچتی رہی ہے۔ تو ہم نے ان کو ناگہاں پکڑ لیا اور انہیں کچھ بھی خبر نہ ہوئی۔

اور اگر ان بستیوں کے لوگ ایمان لے آتے اور پرہیزگار ہوجاتے تو ہم ان پر آسمان اور زمین سے برکتوں کے دروازے کھول دیتے لیکن انہوں نے تو جھٹلایا سو ان کے اعمال کی سزا میں ہم نے ان کو پکڑ لیا۔

کیا بستیوں کے رہنے والے اس سے بےخوف ہیں کہ ان پر ہمارا عذاب رات کو آ واقع ہو جب کہ وہ سو رہے ہوں۔

اور کیا بستیوں کے رہنے والے اس سے نڈر ہیں کہ ان پر ہمارا عذاب دن چڑھے آ نازل ہو جب کہ وہ کھیل رہے ہوں۔

کیا وہ خدا کی چال سے بےخوف ہیں۔ خدا کی چال سے وہی لوگ بےخوف ہوتے ہیں جو خسارہ پانے والے ہیں۔

کیا ان لوگوں کو جو پہلے لوگوں کے بعد زمین کے وارث ہوئے یہ امر موجب ہدایت نہیں ہوا کہ اگر ہم چاہیں تو ان کے گناہوں کے سبب ان پر مصیبت ڈال دیں اور ان کے دلوں پر مہر لگا دیں کہ کچھ سن ہی نہ سکیں۔