ہم عنقریب کافروں کے دلوں میں رعب ڈال دیں گے اس لیے کہ انہوں نے خدا کے ساتھ شریک بنایا ہے جس کی اس نے کوئی سند نازل نہیں کی اور ان کا ٹھکانہ دوزخ ہے اور ظالموں کا ٹھکانہ برا ہے۔

اور خدا نے اپنا وعدہ سچا کر دیا جب تم اس کے حکم سے کافروں کو قتل کر رہے تھے یہاں تک کہ تم نے بزدلی دکھائی اور حکم پیغمبر میں جھگڑا کیا اور اس کی نافرمانی کی اس کے بعد کہ خدا نے تم کو تمہاری مرغوب چیز دکھا دی تھی۔ تم میں سے بعض دنیا کے طالب تھے اور بعض آخرت کے طالب۔ پھر خدا نے تم کو ان (کے مقابلے) سے پھیر دیا تاکہ تمہاری آزمائش کرے۔ اور اس نے تمہارا قصور معاف کر دیا۔ اور خدا مومنوں پر بڑا فضل کرنے والا ہے۔

(وہ وقت یاد کرو) جب تم دور بھاگے جاتے تھے اور کسی کو مڑ کر نہیں دیکھتے تھے اور رسول تم کو تمہارے پیچھے سے بلا رہے تھے تو خدا نے تم کو غم پر غم پہنچایا تاکہ جو (مطلب) تمہارے ہاتھ سے جاتا رہا تھا اور جو مصیبت تم پر پڑی تھی اس سے تم غمگین نہ ہو اور جو کچھ تم کرتے ہو خدا اس سے خبردار ہے

پھر اس نے غم کے بعد تم پر امن یعنی اونگھ بھیجی جو تم میں سے ایک جماعت پر چھا گئی اور ایک جماعت جن کو اپنی ہی جانوں کی فکر پڑی تھی خدا کی نسبت جاہلیت کے سے گمان ناحق کرنے لگے اور کہنے لگے کہ بھلا ہمارے اختیار کی بھی کچھ بات ہے؟ تم کہہ دو کہ بات سب خدا ہی کے اختیار میں ہے۔ یہ لوگ اپنے دلوں میں وہ باتیں چھپاتے ہیں جو تم پر ظاہر نہیں کرتے۔ کہتے ہیں کہ اگر ہمارے اختیار کی کچھ بھی بات ہوتی تو ہم یہاں قتل نہ کیے جاتے۔ کہہ دو کہ اگر تم اپنے گھروں میں بھی ہوتے تو جن کی تقدیر میں مارا جانا لکھا تھا وہ اپنی قتل گاہوں کی طرف ضرور نکل آتے۔ اس سے غرض یہ تھی کہ خدا تمہارے سینوں کی باتوں کو آزمائے اور جو کچھ تمہارے دلوں میں ہے اس کو خالص کر دے۔ اور خدا دلوں کے بھیدوں سے واقف ہے۔

جو لوگ تم میں سے بھاگ گئے تھے جس دن دونوں فوجیں آپس میں ٹکرائی تھیں ان کو شیطان نے ان کے بعض گناہوں کے سبب پھسلا دیا تھا۔ اور خدا نے ان کا قصور معاف کر دیا ہے۔ بےشک خدا بخشنے والا اور بردبار ہے۔

مومنو! ان لوگوں جیسے نہ ہونا جو کافر ہوئے اور اپنے بھائیوں کی نسبت جب وہ سفر کو گئے یا جہاد میں شریک ہوئے (اور وہاں مر گئے یا مارے گئے) کہنے لگے کہ اگر وہ ہمارے پاس رہتے تو نہ مرتے اور نہ مارے جاتے۔ (یہ باتیں) اس لیے (ہیں) کہ خدا ان کو ان کے دلوں میں حسرت (کا موجب) بنا دے۔ اور خدا ہی جلاتا اور مارتا ہے۔ اور جو عمل تم کرتے ہو خدا ان کو دیکھ رہا ہے۔

اور اگر تم خدا کی راہ میں مارے جاؤ یا مر جاؤ تو خدا کی بخشش اور رحمت اس (مال و متاع) سے بہتر ہے جو یہ جمع کرتے ہیں۔

اور اگر تم مر جاؤ یا مارے جاؤ تو خدا ہی کے روبرو جمع کیے جاؤ گے۔

(اے پیغمبر) یہ خدا کی مہربانی ہے کہ تم ان لوگوں کے لیے نرم مزاج واقع ہوئے ہو۔ اور اگر تم بدخو اور سخت دل ہوتے تو یہ تمہارے پاس سے بھاگ کھڑے ہوتے۔ تو ان کو معاف کر دو اور ان کے لیے (خدا سے) بخشش مانگو۔ اور کاموں میں ان سے مشورہ لیا کرو۔ اور جب (کسی کام کا) عزم مصمم کر لو تو خدا پر بھروسا رکھو۔ بےشک خدا بھروسا رکھنے والوں کو دوست رکھتا ہے۔

اگر خدا تمہارا مددگار ہے تو کوئی تم پر غالب نہیں آ سکتا۔ اور اگر وہ تمہیں چھوڑ دے تو پھر کون ہے جو اس کے بعد تمہاری مدد کرے۔ اور مومنوں کو خدا ہی پر بھروسا رکھنا چاہیے۔

اور کبھی ممکن نہیں کہ پیغمبر خیانت کرے۔ اور جو خیانت کرے گا وہ قیامت کے دن اس چیز کو جو خیانت کی ہے حاضر لائے گا۔ پھر ہر شخص کو اس کے اعمال کا پورا پورا بدلہ دیا جائے گا اور ان پر زیادتی نہیں کی جائے گی۔

بھلا جو شخص خدا کی خوشنودی کا تابع ہو وہ اس شخص کی طرح (ہو سکتا) ہے جو خدا کی ناراضی میں گرفتار ہو اور جس کا ٹھکانہ دوزخ ہے۔ اور وہ برا ٹھکانہ ہے۔

اللہ کے ہاں ان کے (مختلف) درجے ہیں اور جو کچھ یہ کرتے ہیں خدا اس کو دیکھ رہا ہے۔

خدا نے مومنوں پر بڑا احسان کیا ہے کہ ان میں انہیں میں سے ایک پیغمبر بھیجے۔ جو ان کو خدا کی آیتیں پڑھ پڑھ کر سناتے ہیں اور ان کو پاک کرتے ہیں اور (خدا کی) کتاب اور دانائی سکھاتے ہیں اور پہلے تو یہ لوگ صریح گمراہی میں تھے۔

(یہ) کیا (بات ہے کہ) جب تم پر مصیبت پڑی حالانکہ (جنگ بدر میں) اس سے دوچند مصیبت تم (کفار پر) ڈال چکے ہو تو کہنے لگے کہ یہ کہاں سے آ گئی کہہ دو کہ یہ تمہاری ہی شامت اعمال ہے (کہ تم نے پیغمبر کے حکم کے خلاف کیا) بےشک خدا ہر چیز پر قادر ہے۔

اور جو مصیبت تم پر دونوں جماعتوں کے مقابلے کے دن واقع ہوئی وہ خدا کے حکم سے (واقع ہوئی) اور (اس سے) یہ غرض تھی کہ خدا مومنوں کو معلوم کر لے۔

اور منافقوں کو بھی معلوم کر لے اور (جب) ان سے کہا گیا کہ آؤ خدا کی راہ میں جنگ کرو یا (کافروں کے حملے کو) روکو تو کہنے لگے کہ اگر ہم کو لڑائی کی خبر ہوتی تو ہم ضرور تمہارے ساتھ رہتے۔ یہ اس دن ایمان کی نسبت کفر سے زیادہ قریب تھے۔ منہ سے وہ باتیں کہتے ہیں جو ان کے دلوں میں نہیں ہیں۔ اور جو کچھ یہ چھپاتے ہیں خدا ان سے خوب واقف ہے۔

(یہ) وہ لوگ ہیں کہ خود تو (جنگ سے) بیٹھ ہی رہے تھے مگر اپنے بھائیوں کی نسبت بھی کہتے تھے کہ اگر وہ ہمارا کہا مانتے تو قتل نہ ہوتے۔ کہہ دو کہ اگر تم سچے ہو تو اپنے اوپر سے موت کو ٹال دینا۔

جو لوگ خدا کی راہ میں مارے گئے ان کو مرے ہوئے نہ سمجھنا (وہ مرے ہوئے نہیں ہیں) بلکہ خدا کے نزدیک زندہ ہیں اور رزق پا رہے ہیں۔

جو کچھ خدا نے ان کو اپنے فضل سے بخش رکھا ہے اس میں خوش ہیں اور جو لوگ ان کے پیچھے رہ گئے اور (شہید ہو کر) ان میں شامل نہیں ہو سکے ان کی نسبت خوشیاں منا رہے ہیں کہ (قیامت کے دن) ان کو بھی نہ کچھ خوف ہوگا اور نہ وہ غمناک ہوں گے۔

اور خدا کے انعام اور فضل سے خوش ہو رہے ہیں اور اس سے کہ خدا مومنوں کا اجر ضائع نہیں کرتا۔

جنہوں نے زخم کھانے کے بعد بھی خدا اور رسول کے حکم کو قبول کیا ان میں جو نیکوکار اور پرہیزگار ہیں ان کے لیے بڑا ثواب ہے۔

وہ لوگ جن سے لوگوں نے کہا کہ لوگوں نے تمہارے مقابلے کے لیے (بڑا لشکر) جمع کیا ہے تو ان سے ڈرو۔ تو ان کا ایمان اور زیادہ ہو گیا اور کہنے لگے ہم کو خدا کافی ہے اور وہ بہت اچھا کارساز ہے۔

پھر وہ خدا کی نعمت اور فضل کے ساتھ لوٹے ان کو کسی طرح کا ضرر نہ پہنچا اور وہ خدا کی خوشنودی کے تابع رہے اور خدا بڑے فضل کا مالک ہے۔

یہ تو شیطان ہے جو اپنے دوستوں سے ڈراتا ہے تو اگر تم مومن ہو تو ان سے مت ڈرنا اور مجھ ہی سے ڈرتے رہنا۔

اور جو لوگ کفر میں جلدی کرتے ہیں ان (کی وجہ) سے غمگین نہ ہونا۔ یہ خدا کا کچھ نہیں بگاڑ سکتے۔ خدا چاہتا ہے کہ آخرت میں ان کو کچھ حصہ نہ دے اور ان کے لیے بڑا عذاب ہے۔

جن لوگوں نے ایمان کے بدلے کفر خریدا وہ خدا کا کچھ نہیں بگاڑ سکتے اور ان کو دکھ دینے والا عذاب ہوگا۔

اور کافر لوگ یہ خیال نہ کریں کہ ہم جو ان کو مہلت دیئے جاتے ہیں تو یہ ان کے حق میں اچھا ہے۔ (نہیں بلکہ) ہم تو اس لیے مہلت دیتے ہیں کہ وہ اور گناہ کریں اور ان کے لیے ذلیل کرنے والا عذاب ہے۔

(لوگو) جب تک خدا ناپاک کو پاک سے الگ نہ کر دے گا مومنوں کو اس حال میں جس میں تم ہو ہرگز نہیں رہنے دے گا۔ اور اللہ ایسا نہیں ہے کہ تم کو غیب سے مطلع کر دے۔ ہاں خدا اپنے پیغمبروں میں سے جسے چاہتا ہے منتخب کر لیتا ہے۔ تو تم خدا پر اور اس کے پیغمبروں پر ایمان لاؤ۔ اور اگر ایمان لاؤ گے اور پرہیزگاری کرو گے تو تم کو اجر عظیم ملے گا۔

جو لوگ مال میں جو خدا نے اپنے فضل سے ان کو عطا فرمایا ہے بخل کرتے ہیں وہ اس بخل کو اپنے حق میں اچھا نہ سمجھیں۔ (وہ اچھا نہیں) بلکہ ان کے لیے برا ہے۔ وہ جس مال میں بخل کرتے ہیں قیامت کے دن اس کا طوق بنا کر ان کی گردنوں میں ڈالا جائے گا۔ اور آسمانوں اور زمین کا وارث خدا ہی ہے۔ اور جو عمل تم کرتے ہو خدا ان سے واقف ہے۔

خدا نے ان لوگوں کا قول سن لیا ہے جو کہتے ہیں کہ خدا فقیر ہے اور ہم امیر ہیں۔ یہ جو کہتے ہیں ہم اس کو لکھ لیں گے اور پیغمبروں کو جو یہ ناحق قتل کرتے رہے ہیں اس کو بھی (قلمبند کر لیں گے) اور (قیامت کے روز) کہیں گے کہ عذاب (آتش) سوزاں کے مزے چکھو۔

یہ ان اعمال کی سزا ہے جو تمہارے ہاتھوں نے آگے بھیجے ہیں اور خدا بندوں پر ظلم نہیں کرتا۔

جو لوگ کہتے ہیں کہ خدا نے ہم سے عہد لیا ہے کہ جب تک کوئی پیغمبر ہمارے پاس ایسی نیاز نہ لائے جس کو آگ کھا جائے (یعنی جلا دے) تب تک ہم اس پر ایمان نہ لائیں گے۔ (اے پیغمبر ان سے) کہہ دو کہ مجھ سے پہلے کئی پیغمبر تمہارے پاس کھلی نشانیاں لے کر آئے اور وہ (معجزہ) بھی لائے جو تم کہتے ہو تو اگر تم سچے ہو تو تم نے ان کو قتل کیوں کیا؟

پھر اگر یہ لوگ تمہیں جھٹلائیں تو تم سے پہلے بہت سے پیغمبر جھٹلائے گئے ہیں جو کھلی نشانیاں اور صحیفے اور روشن کتابیں لے کر آئے تھے۔

ہر متنفس کو موت کا مزہ چکھنا ہے۔ اور تم کو قیامت کے دن تمہارے اعمال کا پورا پورا بدلہ دیا جائے گا۔ تو جو شخص آتش جہنم سے دور رکھا گیا اور بہشت میں داخل کیا گیا وہ مراد کو پہنچ گیا۔ اور دنیا کی زندگی تو دھوکے کا سامان ہے۔

(مومنو) تمہارے مال اور جان میں تمہاری آزمائش کی جائے گی۔ اور تم اہل کتاب سے اور ان لوگوں سے جو مشرک ہیں بہت سی ایذا کی باتیں سنو گے۔ اور اگر صبر اور پرہیزگاری کرتے رہو گے تو یہ بڑی ہمت کے کام ہیں۔

اور جب خدا نے ان لوگوں سے جن کو کتاب عنایت کی گئی تھی اقرار لیا کہ (جو کچھ اس میں لکھا ہے) اسے صاف صاف بیان کرتے رہنا اور اس (کی باتوں) کو چھپانا نہیں تو انہوں نے اس کو پسِ پشت پھینک دیا اور اس کے بدلے تھوڑی سی قیمت (یعنی دنیا کا مال) حاصل کیا۔ یہ جو کچھ حاصل کرتے ہیں برا ہے۔

جو لوگ اپنے کرتوتوں پر خوش ہوتے ہیں اور چاہتے ہیں کہ جو کام انہوں نے نہیں کیے ان پر ان کی تعریف کی جائے ان کی نسبت خیال نہ کرنا کہ وہ عذاب سے رستگار ہو جائیں گے۔ (نہیں بلکہ) ان کے لیے درد دینے والا عذاب ہے۔

اور آسمانوں اور زمین کی بادشاہت خدا ہی کی ہے۔ اور خدا ہر چیز پر قادر ہے۔

بےشک آسمانوں اور زمین کے پیدا کرنے میں اور رات اور دن کے ایک دوسرے کے پیچھے آنے جانے میں عقل والوں کے لیے (خدا کی قدرت کی) نشانیاں ہیں۔

جو کھڑے اور بیٹھے اور لیٹے (ہر حال میں) خدا کو یاد کرتے اور آسمان اور زمین کی پیدائش میں غور کرتے (اور کہتے) ہیں کہ اے پروردگار! تو نے اس (مخلوق) کو بے فائدہ نہیں پیدا کیا۔ تو پاک ہے تو ہمیں آگ کے عذاب سے بچا۔

اے ہمارے پروردگار! جس کو تو نے دوزخ میں ڈالا اسے رسوا کیا اور ظالموں کا کوئی مددگار نہیں۔

اے پروردگار! ہم نے ایک منادی کو سنا کہ ایمان کے لیے پکار رہا تھا (یعنی) اپنے پروردگار پر ایمان لاؤ تو ہم ایمان لے آئے۔ اے پروردگار! ہمارے گناہ معاف فرما اور ہماری برائیوں کو ہم سے محو کر اور ہم کو دنیا سے نیک بندوں کے ساتھ اٹھا۔

اے پروردگار! وہ چیز جو تو نے اپنے پیغمبروں کی معرفت ہم سے وعدہ کی ہے ہمیں عطا فرما اور قیامت کے دن ہمیں رسوا نہ کیجیو۔ بےشک تو وعدہ خلافی نہیں کرتا۔

تو ان کے پروردگار نے ان کی دعا قبول کر لی (اور فرمایا) کہ میں کسی عمل کرنے والے کے عمل کو مرد ہو یا عورت ضائع نہیں کرتا تم ایک دوسرے کی جنس ہو۔ تو جن لوگوں نے ہجرت کی اور اپنے گھروں سے نکالے گئے اور میری راہ میں ستائے گئے اور لڑے اور مارے گئے میں ان کے گناہ دور کر دوں گا اور ان کو بہشتوں میں داخل کروں گا جن کے نیچے نہریں بہہ رہی ہیں۔ (یہ) خدا کے ہاں سے بدلہ ہے اور خدا کے ہاں اچھا بدلہ ہے۔

(اے پیغمبر!) کافروں کا شہروں میں چلنا پھرنا تمہیں دھوکا نہ دے۔

(یہ دنیا کا) تھوڑا سا فائدہ ہے۔ پھر (آخرت میں) ان کا ٹھکانہ دوزخ ہے اور وہ بری جگہ ہے۔

لیکن جو لوگ اپنے پروردگار سے ڈرتے رہے ان کے لیے باغ ہیں جن کے نیچے نہریں بہہ رہی ہیں ان میں ہمیشہ رہیں گے۔ یہ خدا کے ہاں سے (ان کی) مہمانی ہے۔ اور جو کچھ خدا کے پاس ہے وہ نیکوکار کے لیے (ہر چیز سے) بہتر ہے۔

اور بعض اہل کتاب ایسے بھی ہیں جو خدا پر اور اس (کتاب) پر جو تم پر نازل ہوئی اور اس پر جو ان پر نازل ہوئی ایمان رکھتے ہیں اور خدا کے آگے عاجزی کرتے ہیں اور خدا کی آیتوں کے بدلے تھوڑی سی قیمت نہیں لیتے۔ یہی لوگ ہیں جن کا صلہ ان کے پروردگار کے پاس ہے۔ بےشک خدا جلد حساب لینے والا ہے۔

مومنو! ثابت قدم رہو اور (مقابلے کی صورت میں) پامردی دکھاؤ اور (مورچوں پر) جمے رہو اور خدا سے ڈرو تاکہ مراد حاصل کرو۔